bwiza.com
Ahabanza » Kamonyi/Musambira: Umurambo w’umusore wabonwe uziritse ku giti
Amakuru mu Rwanda

Kamonyi/Musambira: Umurambo w’umusore wabonwe uziritse ku giti

Umurambo w’umusore witwaga Niyomugabo Gad wo kigero cy’imyaka 21 wasanzwe mu Mududu wa Ruvumura, Akagali ka Cyambwe, Umurenge wa Musambira, ho mu Karere ka Kamonyi, uziritse ku giti.

Ku wa Kane tariki ya 19 Nyakanga 2019, ubwo bamwe mu baturage bawugeragaho bwa mbere, bahamije ko basanze uziritse, uri mu kagozi k’ishuka.

Tuyishimire Emmanuel, ati “ Nanyuze hano mu gitondo ngiye muri gahunda zanjye, ngiye kubona mbona hari umurambo uhaziritse. Mu byukuri wari uzirikishije ukagozi gatoya k’ishuka kuri iki giti cy’avoka, kandi yari yambaye ubusa.”

Uwitwa Mukamuganga Leodira, na we ati “Nagiye kubona mbona abantu bari guhurura, nanjye mba ndahuruye nsanga umurambo w’umusore uraziritse ku giti yambaye ubusa, byatubereye amayobera.”

Muri aka gace ngo hakunze kumvikana impfu zitandukanye zibasira abaturage bahagatuye. Akaba ariho bahera basaba ko ubuyobozi bwabafasha kubacungira umutekano. Mukamuganga Leodira arakomeza “Tujya twumva imfu z’abantu hirya no hino mu tugari dutandukanye, kandi tugerageza kuhagera tukabyibonera, ubwo turasaba ubuyobozi kuducungira umutekano.”

Ubuyobozi bw’Umurenge wa Musambira bbwatangarije Radiotv Flash ko butaramenya neza icyaba cyateye urupfu rw’uyu musore, icyakora Umunyamabanga nshingwabikorwa w’uyu murenge, Mbonigaba Providance, arasaba abaturage kugira uruhare mu kwirindira umutekano, no gutangira amakuru ku gihe.

Yagize ati “Kugeza ubu ntabwo turamenya icyaba cyateye uru rupfu, gusa iperereza riracyakomeje.Turasaba abaturage kugomeza kwirindira umutekano, gutangira amakuru ku gihe no kugira imibanire myiza hagati yabo.”

Nk’uko bigaragaraza ku byangombwa by’uyu musore, yaravukiye mu Karere ka Ngororero. Amakuru avuga ko yari maze iminsi igera kuri itanu agiye muri uyu mudugudu gusura umuvandimwe we, ariko yaje kubona akazi k’ubupagasi ku mugore witwa Tereza. Uyu Tereza yaje kumuha inzu yo ku isambu, ayibamo amuragirira inka, akanamukorera indi mirimo itandukanye.

Izindi wakunda

Bwiza.com