bwiza.com
Amakuru Umutekano Utuntu n'utundi

Serbia: Yabeshye ko indege itezemo igisasu kugira ngo abone umugore ‘wamukatiye’

Kuri uyu wa 18 Nyakanga muri Serbia, umusaza w’imyaka 65 y’amavuko yabeshye ko indege itezemo igisasu kugira ngo yongere kubona umugore yashatse ko baganira akamuhakanira.

Indege itwara abagenzi ya LH1411 ya kompanyi ya Lufthansa yari igiye muri Frankfurt mu Budage ivuye ku kibuga cy’indege cya Belgrade muri Serbia, ariko ubwo yiteguraga guhaguruka, uyu musaza yahamagaye abakozi ku kibuga cy’indege akoresheje telephone, ababwira ko indege itezemo igisasu.

Ibi byatumye abagenzi 130 bari muri iyi ndege basohoka, itsinda rya polisi rishinzwe gutegura ibisasu rizana n’imbwa, ritangira gushakisha ariko baza kumenya ko cyari ikinyoma.

Uyu musaza yatangarije mu rukiko kuri uyu wa 20 Nyakanga ko yahamagaye abagore babiri bari kumwe ngo basangire ibyo kurya ariko baranga. Yiyemereye yari yakunze umwe muri bo, amusaba ko bajyana muri hoteli arabyanga. Bimunaniye yahise apanga ukuntu yamugumisha mu gihugu kugira ngo bimworohere kongera kumubona, ni ko kubeshya ko indege barimo irimo igisasu.

Ntabwo yatangarijwe amazina. Polisi y’igihugu yamutaye muri yombi kuri uyu wa 19 Nyakanga. Ivuga ko arahanirwa guca igikuba no guteza umutekano muke.

Nyuma y’iki kinyoma, iyi ndege yakereweho amasaha umunane; bituma bamwe bishakira izindi ndege.

 

Izindi wakunda

Bwiza.com
error: Alert: Ntabwo byemewe!!