bwiza.com
Amakuru Politiki

Igisirikare cya Iran cyasohoye amashusho agaragaza uko cyafashe ubwato bw’Abongereza

Igisirikare cya Iran cyashyize ahagaragara video igaragaza igikorwa cy’ishami ryacyo rizwi nka ‘Iran’s Revolutionary Guard (IRGC)’, mu magambo y’Icyongereza, riherutse gukora ryigarurira ubwato bw’u Bwongereza , aho cyemeza ko amato y’intambara y’u Bwongereza yagerageje kuburizamo icyo gikorwa ariko akananirwa.

Iyi video imeze nka filimi nk’uko bitangazwa na Televiziyo y’Abarusiya (RT), ngo yashyizwe ahagaragara n’uyu mutwe w’ingabo wiyemeje kurinda impinduramatwara, IRCG, kuri uyu wa Gatandatu, itariki 20 Nyakanga, umunsi umwe nyuma yo kwigarurira ubwato bw’Abongereza bwitwa Stena Impero.

Iyi video iragaragaza  uko iki gikorwa cya gisirikare ku bwato bwa gisivili cyashyizwe mu bikorwa aho amato yihuta ya gisirikare yabanje kubuzenguruka abasirikare bari mu mazi bagafashwa n’abandi baje muri kajugujugu yamanuriye mu bwato itsinda ry’abakomando bakoresheje umugozi.

Ubwato mu kanya gato bwahise buhagarikwa bujyanwa ku nkombe. Iran igashimangira ko yahagaritse ubu bwato kubera kwanga gutabara ubwato bw’abarobyi b’Abanya-Iran bari bari gutabaza.

Brig. Gen. Ramezan Sharif , Umuvugizi wa IRGC

IRGC kandi iravuga ko hari ubwato bw’intambara bw’Abongereza bwagerageje kubabuza gufata Stena Impero. Umuvugizi wayo, Brig. Gen. Ramezan Sharif yavuze ko nubwo habayeho  kugerageza kubabuza  kw’ubwato bw’intambara, ingabo za Iran zabashije kujyana ubwo bwato bw’Abongereza ku nkombe.

Abakomando ba Iran nyuma yo kwinjira mu bwato, Stena Impero

Abanya-Iran barigamba ibi mu gihe Umunyamabanga wa Leta ushinzwe ingabo mu Bwongereza, Penny Mordaunt, avuga ko ubwato bw’intambara bw’Abongereza, NMS Montrose, bwari kure nk’isaha uvuye aho ubwato bwa gisivili bwafatiwe ku buryo batabashije gukurikirana ibyabaye byose.

NMS Montrose. ubwato bw’intambara bw’Abongereza

Kuri ubu ubu bwato bw’Abongereza bufungiye ku Cyambu cya Bandar Abbas kiri mu majyepfo ya Iran. Abari mu bwato 23, barimo Abahinde 18, mu gihe abandi ari abo mu Burusiya, Latvia na Philippine, bagumishijwe mu bwato, Uwari uyoboye ubu bwato, Stena Cargo, aravuga ko nta kosa bakoze, mu gihe Leta y’u Bwongereza yasabye andi mato kwirinda kunyura mu Kigobe cya Hormuz ikanateguza Iran ko iza guhura n’ingaruka zikomeye.

Ibi bikaba byibutsa ibyabaye kuwa 04 Nyakanga, aho u Abongereza nabo bafataga ubwato buriho ibendera rya Panama, bwitwa Grace 1, babushinja kuvana intwaro muri Iran buzijyana muri Syrira barenze ku bihano by’Umuryango w’Ubumwe bw’u Burayi. Ibi byarakaje Iran ibifata nk’ubushimusi ivuga ko izihorera.

 

Izindi wakunda

Bwiza.com
error: Alert: Ntabwo byemewe!!