bwiza.com
Ahabanza » Kamonyi: Bizejwe uruganda rutunganya Ikigage none barategereje baraheba
Amakuru mu Rwanda

Kamonyi: Bizejwe uruganda rutunganya Ikigage none barategereje baraheba

Bamwe mu baturage bo mu duce dutandukanye two mu Karere ka kamonyi, mu Ntara y’Amajyepfo, usanga banywa Urwagwa n’Ikigage bavuga ko biba byatunganijwe mu buryo bwa gakondo mu ngo zabo ndetse bitujuje ubuziranenge, gusa bakemeza ko bari bizejwe uruganda rwo kubitunganya ariko na n’ubu amaso akaba yaraheze mu kirere.

Aba baturage bavuga ko bari bagize akanyamuneza nyuma yo kwizezwa ko bagiye guhabwa uruganda rutunganya Ikigage, bari biteze ko bazaruhabwamo akazi ndetse bakajya banakinywa cyuzuje ubuziranenge.

Uyu ati “Usaba litilo bakagenda bakadaha bakaguhereza tukanywa nta bindi, inaha tunywa Ibigage byitwa Pakimaya n’Ubushera, nta buziranenge mbese biba bifite ibyo mu giturage”.

Mugenzi we avuga ko nyuma yo kwizezwa uruganda bumvaga ko bagiye kuzajya banywa Ikigage gisukuye, ati “Twumvaga ko kizaba ari Ikigage kizaba cyujuje ubuziranenge, gisukuye gikoranye umucyo, hanyuma umwanda ukamaganwa mu Kigage”.

Uruganda barutezeho iterambere, ati “Ruzaha abaturage akazi, amasaka agire agaciro, mbese abantu bose babashe kunywa Ikigage gipfundikiye, kandi babashe kubona akazi bakorere amafaranga bisanzuye”.

Mu kwezi kwa Cyenda umwaka ushize nibwo imishinga yo kubaka inyubako z’uru ruganda yatangiye, biteganijwe ko inyubako zizarangira mu mezi atatu n’imashini zigashyirwamo, muri Mata uyu mwaka rukaba aribwo rwagombaga gutangira gukora

Umuyobozi w’Akarere ka Kamonyi, Kayitesi Alice, ati “Igihe cyari cyaragenwe kugira ngo rutangiye ntabwo twacyubahirije, hagiye habaho imbogamizi mu bijyanye no kubaka bituma imirimo itihuta ariko ubu yararangiye, uru ruganda ruzuzura rutwaye Miliyoni 900”.

Akomeza avuga ko uru ruganda ‘Usine d’Ikigage’ ruzabafasha kubona Ikigage gitunganije, ku buryo kitabangiriza ubuzima. Imashini za ngombwa zamaze kugezwa muri uru ruganda. Meya Alice akemeza ko ruratangira gukora vuba, ku munsi rukazajya rutunganya Litiro ibihumbi 12 by’Ikigage gisembuye n’ikidasembuye.

 

 

Izindi wakunda

Bwiza.com