bwiza.com
Ahabanza » Kutongera kwiyamamaza kwa Nkurunziza kuzabyutsa umubano w’Uburundi n’Ubufaransa?
Amakuru mashya Politiki

Kutongera kwiyamamaza kwa Nkurunziza kuzabyutsa umubano w’Uburundi n’Ubufaransa?

Ubufaransa n’Uburundi ni ibihugu byari bisanzwe bifitanye umubano mwiza ariko amatora y’umukuru w’igihugu yabaye mu 2015 yabaye imbarutso yo gutandukana.

Ibi byatewe n’uko Perezida Pierre Nkurunziza yiyamamarije manda ya gatatu, nyamara itegekonshinga ryaremezaga manda ebyiri zarangira, hakiyamamaza abandi. Uyu mukuru w’igihugu yatsinze aya matora mu buryo bamwe bise ko bwari bufifitse.

Yemeza ko aziyamamariza manda ya gatatu, abaturage benshi n’abatavuga rumwe na leta ye binubiye iki cyemezo, bateza imvururu.

Leta ya Nkurunziza yashinzwe gushinga umutwe w’insoresore zarwanyaga abatavuga rumwe n’ubutegetsi, ukitwa ‘Imbonerakure’ kandi n’ubu uracyahari. Uyu mutwe kandi bamwe bawita ‘uw’iterabwoba’.

Imbonerakure ni iz’ishyaka rya CNDD-FDD riri ku butegetsi

Ingaruka z’amatora ya 2015 zatumye abaturage benshi bahunga igihugu, bajya mu bihugu by’ibituranyi nko mu Rwanda, Congo na Tanzania. Urugero: Mu Rwanda, mu nkambi ya Mahama hari ibihumbi bisaga 50,000, zose zari zarahunze ibikorwa biteza umutekano muke.

Ibi ni byo Ubufaransa bwashingiyeho buhagarika ubufasha; bwaba ubwa gisirikare cyangwa ubundi bwageneraga Uburundi. Icyemezo nk’iki kandi cyafashwe n’Umuryango w’Ubumwe bw’Uburayi.

Nyuma yo kumva ko Perezida Nkurunziza ashobora kutazongera kwiyamamaza mu matora azaba mu 2020, Ubufaransa bwaracururutse ngo bushobora kongera gufasha iki gihugu, umubano wahozeho ukabyutswa.

Radio mpuzamahanga y’Abafaransa, RFI yatangaje ko uhagarariye Ubufaransa mu Burundi, Delahousse Laurent yavuze ko igihugu cye kizigishiriza bamwe mu basirikare b’Uburundi mu Bufaransa, Gabon na Senegal.

Ibibazo by’umutekano muke mu Burundi byabugizeho ingaruka nyinshi harimo no kwangirwa kuba umunyamuryango w’ibihugu by’Afurika y’amajyepfo, SADC. Perezida wa Namibia, Hage Geingob ari nawe muyobozi w’uyu muryango yatangaje ko Uburundi butujuje ibisabwa. Yabusabye ‘kubanza gukemura ikibazo cy’umutekano muke’.

 

 

 

Izindi wakunda

Bwiza.com