bwiza.com
Ahabanza » Koreya y’Epfo yarashe amasasu asaga 300 yihanangiriza indege y’Uburusiya-CNN
Amakuru Politiki Umutekano

Koreya y’Epfo yarashe amasasu asaga 300 yihanangiriza indege y’Uburusiya-CNN

Kuri uyu wa 23 Nyakanga, indege ya gisirikare ya Koreya y’Epfo yarashe ku y’Uburusiya amasasu asaga 300 iyihanangiriza kuko yayivogereye ikirere. Aya makuru yemejwe n’igisirikare cya Koreya y’Epfo nyuma y’iki gikorwa.

Igisirikare cy’iki gihugu gishinja indege ya A-50 kukivogerera ikirere ubugira kabiri. Iki gikorwa kikaba gifatwa nk’ubushotoranyi n’agasuzuguro.

Koreya y’Epfo yihanangirije Uburusiya nyuma y’amasaha make indege za gisirikare z’Ubushinwa (H-6) zinyuze muri iki kirere na bwo mu buryo ibihugu byombi bitumvikanyeho. Iki gihugu kivuga ko igisirikare cy’Uburusiya n’icy’Ubushinwa bishobora kuba byakoreraga hamwe imyitozo.

Minisitiri w’ingabo wa Koreya y’Epfo yavuze ko ari ubwa mbere ibihugu  by’amahanga biyivogerereye ikirere.

Ubuyapani na bwo bwemeza ko izi ndege z’ibihugu byombi zabuvogereye ikirere muri aya masaha. Umuvugizi wa Minisiteri y’ingabo yavuze ko igihugu cye kigiye gufatira ingamba abinjirira ikirere cyabo mu buryo butemewe,

Minisitiri w’ingabo w’Uburusiya we yavuze ko indege zabo ebyiri zari zifite gahunda yo kwitoreza hejuru y’amazi atagira nyirayo mu nyanja y’Uburasirazuba (East Sea). Anenga umupilote wa Koreya wagerageje kurasa kuko ngo nta bunyamwuga burimo. Yemeza ko uyu mupilote atigeze avugana n’uw’Uburusiya mbere yo kurasa.

Uku kwihanangirizanya hagati y’ibisirikare kubaye nyuma y’ukwabaye, ubwo indege ya gisirikare ya Venezuela imuritse igitara iya Leta Zunze Ubumwe z’Amerika. Yayishinjaga kwinjira mu kirere cyayo.

Byakurikiwe kandi n’inkuru zitandukanye za Iran zirimo kurasa indege y’ubutasi y’Amerika. Iran kandi yafashe ubwato bw’amavuta bw’Ubwongereza, ibushinja kwinjira mu gace igenzura mu kigobe cya Hormuz.

Izindi wakunda

Bwiza.com