bwiza.com
Amakuru mu Rwanda

Rusizi/ Nkombo: Imiryango 24 yashyikirijwe inzu zo guturamo- AMAFOTO

Imiryango 24 yo mu tugari tunyuranye two mu murenge wa Nkombo mu karere ka Rusizi yabaga mu buryo buteye agahinda urebye uko inzu yabagamo zari zimeze yashyikirijwe inzu nziza zo guturamo  n’amatorero ya ADEPR Ishywa,EMLR Nkombo na EAR Nkombo ku bufatanye na Compassion international,ikaba yishimiye gutura heza habereye ikiremwamuntu.

Muri izi nzu harimo 8 zo mu kagari ka Ishywa,2 zubatse mu kagari ka Rwenje,6 zubatse mu  ka Kamagimbo na 8 zubatse mu ka Bigoga, abubakiwe bose bakaba ari abasanzwe bafite abana bafashwa n’aya matorero mu mishinga yayo iterwa inkunga na Compassion international,bamwe usanga ari abagore bagiye batabwa n’abagabo kubera amakimbirane yo mu miryango,abndi babiterwa n’ubukene bukabije barimo kubera ko ngo kuri iki kirwa cya Nkombo ubuzima buruhije cyane,cyane cyane ko nta mishinga itanga akazi ku bantu benshi wahabona.

Umushumba wa ADEPR Paruwasi ya Ishywa, Rév. Pasiteri Uwimana Schadrack yabwiye Bwiza.com ko bamwe mu bazihawe  bararanaga n’amatungo mu nzu z’icyumba na salo,abandi babanaga ari nka 6 mu kazu k’icyumba kimwe na cyo cyatangiye kugwa,abandi bacumbikishiriza abana mu baturanyi,ugasanga nubwo bafite abana bafasha muri iyi miryango ariko imibereho mibi yatumaga bataniga neza,ari yo mpamvu basanze gukemura ikibazo cy’aho kuba byaba ishingiro ry’indi mibereho myiza yabo.

Ati’’ buri wese yashyikirijwe inzu y’ibyumba 3 n’icy’uruganiriro,irimo sima,ikomeye neza anashyikirizwa igikoni,ubwiherero n’ubwogero,intebe,ibiryamirwa,n’ibindi  byose hamwe kuri buri nyubako bitwaye 2.700.000, tukizera ko zizafatwa neza kuko dukurikije uburyo babagaho twizera ko zo batazazirazamo amatungo cyangwa ngo babure kuzigirira isuku ihagije.’’

Ntabakobwa Eménce w’imyaka 28 y’amavuko utuye mu kagari ka Ishywa na Nyiranzeyimana Félicité utuye mu  ka Rwenje bahawe inzu, bombi bahuriye ku kuba abagabo barabatanye abana bonyine kandi nta yindi mibereho bafite aho ngo banaburara bakabwirirwa n’aba bana babo,kubona icyo kurya bigasaba kujya guca inshuro bambutse ikivu  na byo bitoroshye n’inzu babagamo ziva cyane,imvura yagwa bakarara bahagaze n’abana na ba nyirakuru b’aba bana mu tuzu tw’icyumba kimwe gusa,bakaba bishimiye gutura ahagutse.

Ntabakobwa Eménce yishimiye ko abonye aho aba n’abana be

Kuba amakimbirane mu miryango ikiba intandaro y’imibereho mibi ya bamwe mu batuye uyu murenge bituma abagabo bahitamo guta abagore batanabubakiye  bakigira gushaka abandi, umushumba w’itorero EMLR Paruwasi ya Nkombo,Pasiteri Ngirabakunzi Jean Baptiste avuga ko hakenewe imbaraga zirushijeho mu gukumira aya makimbirane imiryango ikabana neza kandi ko banabitangiye mu matorero yabo ,akaboneraho gusaba imiryango kubana neza igaharanira iterambere aho gushyirana mu buzima bugoye nk’uku.

Avuga ko hari n’izindi nzu 145 zimeze nabi cyane zigiye gusanwa muri iyi paruwasi ayobora,kimwe n’izindi ziri ku Ishywa na zo zishobora kugwa kuri ba nyira zo umwanya uwo ari wo wose igihe imvura yaba iguye ari nyinshi, ushinzwe inkunga zigenerwa abafatanyabikorwa muri Compassion international,Kayumba Amanda na we akaba yijeje ubufatanye ngo ibi byose bizagerweho,kugira ngo abana bitaho babe mu miryango itekanye,ifite n’aho iba hayihesheje agaciro.

Ku bijyanye n’uko izi nzu nta mashanyarazi azirimo uwari uhagarariye ubuyobozi bw’umurenge wa Nkombo Uwamahoro Théophile yijeje abazihawe ko bitarenze amezi 2 bazaba bahawe amashanyarazi,ibindi bijyanye n’imibereho yabo bakazagenda bafatanya na bo kubikemura.

Uyu murenge utuwe n’abaturage barenga gato 17.000, imiterere yawo kubera kuzengurukwa n’amazi y’ikivu  ikaba itorohereza imiturire myiza,cyane cyane ko ibikoresho byinshi by’ubwubatsi biva hakurya y’amazi bikabageraho bihenze cyane nta n’uburyo bwo gukora ku ifaranga biboroheye bagira,ari yo mpamvu usanga abenshi baba mu nzu zishaje cyane zenda kubagwira.

Ubwo inzu aba baturage bahawe bazitahaga ku mugaragaro

 

Izindi wakunda

Bwiza.com
error: Alert: Ntabwo byemewe!!