bwiza.com
Amakuru Ubukungu

Uganda: Minisitiri yasabye abagemuraga ibicuruzwa mu Rwanda kurwibagirwa

Minisitiri w’Ubucuruzi wa Uganda, Amelia Kyambadde yasabye abacuruzi kwirengagiza kugurisha ibicuruzwa byabo mu Rwanda kuko ngo ari isoko rito.

Mu nama y’Ikigo cy’Igihugu cy’Igenamigambi  (NPA) ku bufatanye n’Ishami ry’Umuryango w’Abibumbye ryita ku Iterambere (UNDP) yabereye muri Serena Hoteli i Kampala ku wa 25 Nyakanga 2019, Min. Kyambadde yasabye abacuruzi kuva mu byo yise “ Amarangamutima” yabo ku Rwanda, ahubwo bakabyaza umusaruro andi masoko aboneka mu Karere Uganda iherereyemo.

Kyambadde yagize ati “  Ntabwo dukomeza guheranwa n’ubucuruzi bw’abantu bangahe, miliyoni umunani.”

Yakomeje agira ati “ Nibyo, dufitiye amarangamutima u Rwanda. Ariko niba muri gukora ubucuruzi, mukwiye kwibagirwa u Rwanda. Mureke dushakire ahandi. Mpora mbwira Abanya Uganda nti ‘reka tujye gucururiza muri Congo’, reka tujye mu bandi baturanyi. Ibyo ni amarangamutima, ubucuruzi buvuze amafaranga.”

Minisitiri Kyambadde yabibwiye abacuruzi bijujutiraga ngo ifungwa ry’Umupaka wa Gatuna bavuga ko ryanize ubucuruzi bwabo.

Ni mu gihe Kompanyi nini zoherezaga ibicuruzwa mu Rwanda zivuga ko zahombye miliyari  35 z’amashilingi ya Uganda kuva habayeho ibibazo by’imipaka.

Kyambadde kandi yakuriye inzira ku murima abagiye bamugezaho ibirego byabo ko imodoka n’indi mitungo yabo byaheze mu Rwanda, bityo ko basaba impozamarira. Mu magambo ye “ Leta nta ni umwe mu bahombye izarwanaho.”

Umuyobozi w’Ishyirahamwe ry’Abacuruzi muri Kampala (Kacita),  Everest Kayondo yavuze ko ibyo Kyambadde avuze bibashyize mu cyeragati.

 

Izindi wakunda

Bwiza.com
error: Alert: Ntabwo byemewe!!