bwiza.com
Ahabanza » Rwamagana: Arasaba kurenganurwa agahabwa imitungo yasigiwe n’umubyeyi
Amakuru mu Rwanda

Rwamagana: Arasaba kurenganurwa agahabwa imitungo yasigiwe n’umubyeyi

????????????????????????????????????

Uwimana Victorie utuye mu Mudugudu wa Rutonde, Akagari ka Bwiza,  mu Murenge wa Kigabiro, mu Karere ka Rwamagana,  aratakamba asaba inzego zibishinzwe kumurenganura agahabwa imitungo avuga ko muramukazi we yanze kuvamo kandi yarayisigiwe na nyina, Nyiradende Ancille witabye Imana .

Uwimana Victorie yemeza ko umutungo yasigiwe n’umubyeyi we muramukazi we Cyabaganwa yanze kuwuvamo kandi yarabonye n’ibyangombwa by’ubutaka cyabwo.

Yagize ati “Tumaze imyaka myinshi dusabwa kurenganurwa tugahabwa ubutaka bwacu ,umubyeyi wacu akiriho Cyabaganwa yamwirukanye mu mitungo ye yose ariko baraburana bigaragara ko umugabo we yari yarubatse mu rugo rw’umukecuru bafata umwanzuro ko yajya kubaka mu munani w’umugabo kuko wari uhari ahandi umubyeyi arahangenera mu burage kuko yampisemo kuko namufashije  ubwo yari amaze kugira intege nke ariko ikibabaje ni uko n’ubwo twahawe ibyangombwa by’ubutaka bwose Umukecuru yari asigaranye burimo aho yari atuye ndetse n’ahandi hahingwaga hose Cyabaganwa niwe ukihakoresha”.

Uwimana arakomeza asaba ko Cyabaganwa yakurwa mu mutungo wabo bakawuhabwa aho gusiragizwa kandi bigaragara ko bananizwa.

Aragira ati “Ndasaba ko ababishinzwe badufasha kuko hashize imyaka myinshi dusaba kurenganurwa ariko tugakomeza kunanizwa, twitabaje inzego zose zirimo n’abagenzacyaha ariko twabuze uwadufasha tugabwa ibyacu kuko umukecuru yaramutsinze ajya kujurira mu rukiko ariko rwanga kwakira ikirego cye, icyo gihe cyose nabaga ndi kumwe n’umukecuru atarapfa kugeza ubu ntarava ku izima ngo aduhe umutungo wacu twasigiwe n’umubyeyi wacu”.

Mukakarisa Maria uvukana na Victoria Uwimana na we arasaba ko barenganurwa bagahabwa umutungo basigiwe n’ababyeyi babo. ati ” Ntabwo twumva impamvu akomeza kwigomeka akaguma mu mitungo yacu twasigiwe n’ababyeyi kuko aho umukecuru yari atuye ni ingarigari yacu hakaba n’ubutaka bwahawe murumuna wacu witaga ku mubyeyi akiriho byose yanze kubitanga abigira ibye”.

Ku ruhande rwa Cyabaganwa Leonille avuga ko ntacyo apfa na victorie ahubwo ari ibibazo biri mu muryango wabo byaturutse kuri mukeba we, umugore wa muramu we, ngo afatanyije n’abana be, ngo batamushaka mu muryango.

Ashimangira ko yigeze kwandikira urukiko rw’ibanze arusaba gutesha kashe mpuruza agaciro ariko urukiko ntirwakire ikirego cye . Anavuga ko yanze kuva muri iyo mitungo kuko bashakaga kumumenesha mu mitungo ye bitewe bitewe n’amakimbirane bari bafitanye

Ubuyobozi bw’Akagari ka Bwiza buremeza ko buzafasha Uwimana akarenganurwa bashingiye ku byemezo by’imanza baburanye ndetse n’ibyangombwa by’ubutaka.

Umunyamabanga Nshingwabikorwa w’Akagari Ka Bwiza, Muhiza Etienne ,aragira ati “Icyo kibazo nasanze gihari kuko twari tuzi ko byarangiye kuko byajemo abahesha b’inkiko b’umwuga ariko niba harimo akarengane uwagombaga kubona ibyo yatsindiwe akaba atarabihawe icyo twasaba victorie azaze ku kagari turebe ibyangombwa by’ubutaka niba abifite azabizane tuzamufasha nibitunanira tuziyambaza izindi nzego arenganurwe”.

Izindi wakunda

Bwiza.com