bwiza.com
Ahabanza » U Rwanda rwageze hasi kure ku buryo icyari gisigaye ari ukwirwanaho-Perezida Kagame
Amakuru Featured Politiki

U Rwanda rwageze hasi kure ku buryo icyari gisigaye ari ukwirwanaho-Perezida Kagame

Perezida wa repubulika, Paul Kagame, yatangaje ko nta kindi gisubizo Abanyarwanda bari bafite usibye kwirwanaho kuko usubije amaso inyuma ukareba aho u Rwanda rwari rugeze rugana hasi hari harangiye nta handi hasigaye, andi mahitamo yari asigaye ari ukubyuka rukazamuka kandi rwabigerageje.

Ibi Perezida Kagame yabitangarije mu gihugu cya Nigeria, aho yitabiriye inama ya rwiyemezamirimo, Tony Elumelu, y’iminsi ibiri yahuje ba rwiyemezamirimo barenga 5000 baturutse ku mugabane wa Afurika.

Perezida Kagame ni umwe mu bakuru b’ibihugu bagomba gutanga ibiganiro muri iyi nama kimwe na Perezida wa Senegal, Macky Sall, uwa Repubulika Iharanira Demokarasi ya Congo, Félix Tshisekedi, Visi Perezida wa Nigeria Yemi Osinbajo na Minisitiri w’Intebe wa Uganda, Ruhakana Rugunda.

Mu ijambo rye agaruka ku mpinduka u Rwanda rwakoze, Perezida wa Repubulika yavuze ko ikintu cya mbere cyakozwe ari uguhindura imitekerereze y’Abanyarwanda. Ati: “Ikintu cya mbere twagombaga guhangana nacyo ni uguhindura imitekerereze y’abantu bacu. Kubera ko hari amateka, aho abantu bakundaga kwiyicarira ibintu bakabihabwa ku buntu biturutse hanze.

Umukuru w’igihugu yakomeje agira ati: “Twagombaga gushaka uko twizera ko Abanyarwanda bumva ko bagomba kuhibera. Ibi biranareba Afurika ndabyizeye. Twagombaga gukora uruhare rwacu. Nubwo twabona inkunga tuyikoresha kugirango twiyongerere imbaraga hanyuma tukayubakiraho.”

Perezida kagame yakomeje avuga ko mu guhindura imitekerereze, Abanyarwanda bashyizwemo kuvuga ko iterambere ryabo ribareba kandi bagomba kugeraho. Ati: “Ni gute rero twageze aha? Twagombaga gushyiraho icyerekezo cy’uko tujya imbere.”

Yakomeje agira ati: “Twaravuze tuti: Banyarwanda, nitwe biheraho. Tumaze gukora ibingana iki, Twishoyemo bingana iki kubw’ubumenyi, bidufata igihe kingana iki gukora ibintu tuzi ko tugomba gukora tudategereje ko hari umuntu uza akabidukurera,”

Perezida Kagame yabajije iyo ushoye imari mu kubaka ubumenyi, n’ibikorwaremezo icyo ubikoresha. Avuga ko hakurikiraho gukora business, kuba rwiyemezamirimo, no guhanga udushya. Ibi ariko ngo ntiwabikora utateguye imiyoborere myiza.

Yavuze ko uku ari ko u Rwanda rwabigenje kandi rwari ku gitutu kinshi kubera aho rwari ruvuye kandi Abanyarwanda bagombaga kwiyumvisha ko bashobora kubikora kandi nta yandi mahitamo. Ati: “Twatangiye gukora uko dushoboye. Niko twateye intambwe nziza.’

Yakomeje agira ati: “Twabashije guhindura imitekerereze y’abantu bacu, ngo bamenye icyo babereyeho, icyo bakeneye gukora, icyo bifitemo, kandi twanunze igihugu cyacu.

Yavuze ko igihugu cyari cyaracitsemo ibice kubera politiki zivangura, ariko ubu igihugu cyabaye kimwe kandi kigashyirwa mu nzira igana iterambere kiri kugeraho.

Ati: “Ibi ni ukubera abaturage, kubera inzego, kubera politiki twagerageje gushyiraho. Turi kwigisha abaturage bacu, turi gushora mu buzima bwabo.”

Perezida Kagame yasoje avuga ko Abanyarwanda gukorera hamwe, n’ubuhanga n’ubumenyi n’icyizere bifitiye ari wo murage w’ingenzi atekereza bafite.

 

Izindi wakunda

Bwiza.com