bwiza.com
Ahabanza » Burera: Ababyeyi bahangayikishijwe n’uburwayi bw’amaso bwibasiye abana
Amakuru Ubuzima

Burera: Ababyeyi bahangayikishijwe n’uburwayi bw’amaso bwibasiye abana

Uburwayi bw’amaso buri kwibasira abana bari hagati y’amezi  3 kugeza kumyaka 18 bo mu mirenge ya Ruhunde na Rwerere, mu karere ka Burera, Intara y’Amajyaruguru, bityo ababyeyi bakavuga ko bubahangayikishije cyane.

Bamwe muri aba babyeyi bavuga umwana wafashwe n’ubu burwayi, amaso ye ahinduka umukara cyangwa umuhondo, ndetse ko iyo bagiye kwa muganga, babwira ko iki kibazo cy’amaso nabo kibahangayikishije.

Nyirimana Clemence ati ati “Ikibazo cy’amaso muri uyu murenge wa Ruhunde kiraduhangayikishije ku bana kuva ku mezi atandatu kugeza ku myaka 18. Usanga uyu munsi yakeye ejo ukongera ukabona amaso yabaye indungurungu, ukaba wagira ngo umwana sinzi uko byagenze”.

Uwitwa Irimuritwe Jovanis na we ati “Abonzi ni abahungu bo kwa Byigero batatu, mbona amaso yabo ari umukara abandi ari umuhondo, ntabwo abarya usibye ko hari igihe kigera bagakuba mu maso, ni ikibazo cyugarije abana inaha, ariko ntago tuzi ikibitera.”

Aba babyeyi baganiriye na Radiotv flash, bavuga ko iyo bajyanye abo bana kwa muganga, abaganga nabo bababwira ko icyo kibazo cy’amaso kibahangayikishije. Uyu ati “Baduha imiti akamera nkaho yoroshye ho gato, ariko noneho ukongera ukabona ikibazo cy’amaso kirongeye kirijimye burundu, abaganga baradufasha mu mbaraga bafite, ariko nabo batubwira ko ikibazo cy’amaso kibahangayikishije.”

Umuyobozi w’akarere ka Burera, Uwambajemariya Florence, avuga ko barimo gufatanya n’abaganga mu gukurikirana ubu burwayi. Yagize ati “Turafatanya n’abaganga turebe imiterere y’ubwo burwayi, nibo bazanatubwira uko biteye hanyuma dufatanye gukurikirana no gukumira.”

Izindi wakunda

Bwiza.com