bwiza.com
Ahabanza » Nyamasheke/Karambi: Iterambere ry’abagore riracyakomwa mu nkokora no gutinya gukorana n’ibigo by’imari
Amakuru Ubukungu

Nyamasheke/Karambi: Iterambere ry’abagore riracyakomwa mu nkokora no gutinya gukorana n’ibigo by’imari

Ubuyobozi bw’umurenge wa Karambi buvuga ko  40% by’abagore bawo ari bo bonyine bagana ibigo by’imari, muri bo abatinyuka inguzanyo bakaba bake kuri aba, ibi ngo bikaba bibazitira mu iterambere.

Byagaragajwe ubwo abagore bagera ku 140 b’uyu murenge wa Karambi bahugurwaga ku gutinyuka gukorana n’ibigo by’imari muri gahunda yiswe’’ Tinyuka wigire munyarwandakazi’’ yatekerejwe n’ishyirahamwe ry’ibigo by’imari biciriritse ( AMIR) nyuma yo kubona ikibazo nk’iki mu bigo by’imari biciriritse hafi ya byose byo mu Rwanda.

Bamazwe impungenge ngo batinyuke kugana ibigo by’imari

Umucungamutungo wa  KVS ( Karambi Vision SACCO), Bumbari Machiavel  avuga ko iki ari ikibazo gikomeye kuko nko mu banyamuryango barenga 12.000 bafite abagore batarenga 42% kandi nyamara imirimo iciriritse ibyara inyungu nto yo gufasha ingo mu iterambere uyisangamo abagore  cyane, bigaterwa no kwitinya kwabo kukigaragara no kumva ko ibyo kubitsa no kugana ibigo by’imari ari iby’abagabo.

Ati “Ni ikibazo ariko igishimishije ni uko hari bamwe mu bagore barenze iyo myumvire bagatinyuka inguzanyo bagakora imishinga minini ubu batangiye kugira amafaranga agaragara, ni yo mpamvu hatekerejwe iyi gahunda ya ‘’ tinyuka wigire mumyarwandakazi’’.

Bamwe muri aba bagore  bavuga ko hari abagabo bagifite imyumvire ikiri hasi ivuga ko umugore watangiye kugira amafaranga  aba atacyumvira umugabo, bamwe mu bagore bagatinya ko byabakururira akaga no kutumvikana n’abagabo byanatuma babata bakishakira abandi,bagahitamo kubibaharira.

Mukagasana Emilienne w’imyaka 62, utuye mu kagari ka Gasovu, yabwiye Bwiza.com, avuga ko kugana ibigo by’imari byateje imbere umuryango we, ati “Gutinyuka inguzanyo jye maze kubona inyungu zabyo kuko  mfite abana banjye 3 maze kugurira moto 5 mu nguzanyo mfata nkabaha bakazikoresha ayo bampaye nkayishyura kandi twese mu muryango byaduteje imbere.

Yakomeje agira ati “Undi muhungu wanjye namufashije kubona amagare 2, ndashaka gufata andi nkamugurira na we moto, gusa nanjye mfite umugabo unywa inzoga ariko twumvikanye ko ay’agacupa nzajya nyamuha ariko ntambangamire mu mikoranire na SACCO kuko nshaka guteza abana banjye imbere.  Abagore benshi banga kwiteranya n’abagabo kuko bayabaka bakayanywera ni cyo kibazo dufite dushaka ko ubuyobozi budufasha gukemura.’’

Musabyimana Alphonsine, umufashamyumvire mu kigo SBFIC gifasha AMIR muri ibi bikorwa asanga nta rwitwazo na rumwe rwabuza umugore amahirwe Leta yamuhaye yo kwiteza imbere,abagabo nk’aba bakaba bakwiye kwigishwa kuko iyo umugore yateye imbere byorohera umuryango wose kuzamura ubukungu bwawo.

Umunyamabanga nshigwabikorwa w’uyu Murenge, Uwizeyimana Emmanuel, avuga ko intego ari uko abagore bose  bagana ibigo by’imari bagateza ingo zabo imbere, akaba agiye kuganira n’abagabo bagifite iyo myumvire igahinduka, amahirwe  umugore yahawe n’ubuyobozi bw’igihugu akagera no ku gutinyuka ifaranga.

Iterambere ry’aba bagore bo mu murenge wa Karambi ntiryihuta kubera gutinya inguzanyo

Izindi wakunda

Bwiza.com