bwiza.com
Amakuru Politiki

Uganda yataye muri yombi abandi barobyi 15 b’Abanyekongo

Abarobyi bagera kuri 15 b’Abanyekongo kuri uyu wa Gatandatu ushize batawe muri yombi n’abashinzwe umutekano wo mu mazi muri Uganda mu majyaruguru y’Ikiyaga cya Edouard, muri Teritwari ya Beni. Abafashwe barashinjwa gukora uburobyi butemewe mu mazi ya Uganda nk’uko abarobyi bakorera ahitwa Kyavinyonge bavuga. Abakuriye aba bakaba banenga imyitwarire ya guverinoma ya Congo ku itabwa muri yombi rya hato na hato ry’abaturage bayo.

Mu barobyi 15 bafashwe, harimo icyenda bo mu ishyirahamwe ry’abarobyi rya Kyavinyonge, bose bajyanywe muri Uganda aho bafungiwe. Amakuru akavuga ko umwe muri bo w’umurwayi yahise ajyanwa kwa muganga ahitwa Kasindi Lubiriya.

Augustin Kambale, ushinzwe umutungo w’iri shyirahamwe ryo muri Nyavinyonge, arasaba abayobozi b’igihugu gufata iyi dosiye nk’ikomeye hagashakwa umuti urambye w’iki kibazo gihoraho hagati y’Abarobyi b’Abanyekongo n’Abagande ku micungire y’umutungo ukomoka ku mafi bahuriyeho, mu Kiyaga cya Edouard.

Barasaba Guverinoma ya Congo kugaragaza neza imbibi zo mu mazi zitandukanya Congo na Uganda mu rwego rwo kugirango abarobyi b’Abanyekongo batazajya bambuka umupaka batabizi. Barasaba Guverinoma ya Congo kandi gukurikirana abarobyi b’Abanyekongo bagifungiye muri gereza zo muri Uganda mu buryo bubi nk’uko iyi kuru dukesha Radio Okapi ikomeza ivuga.

Abandi barobyi b’Abanyekongo bagera kuri batatu batawe muri yombi mu cyumweru cyabanjirije igishize bafashwe n’abashinzwe umutekano wo mu mazi b’Abagande mu Kiyaga cya Edouard. Byibuze abarobyi 140 b’Abanyekongo bakaba bafungiye muri Uganda kuva mu mwaka ushize bashinjwa uburobyi butemewe.

 

Izindi wakunda

Bwiza.com