bwiza.com
Amakuru Ubukungu

Nyamasheke: Ab’ukuboko kurekure banyereza amafaranga ya Koperative baburiwe

Ubuyobozi bw’akarere ka Nyamasheke buvuga ko nubwo hari amakoperative amaze kugira aho ageza abanyamuryango bayo kubera imicungire myiza y’umutungo wayo, hari n’andi afite imikorere ikemangwa cyane kubera uburyo acunzwe nabi, hari n’ubwoba bw’uko amafaranga y’abanyamuryango yaba anyerezwa cyangwa yarananyerejwe, harimo n’ayo bakurikirana ubu ngo barebe irengero ry’amafaranga y’abanyamuryango,hakaba n’andi ameze nka baringa, n’abyiyitirira atari yo,muri ayo yose ngo agera kuri 55,9% gusa ni yo afite aho aganisha abayagize.

Ni bimwe mu byagaragarijwe umuyobozi mukuru w’ikigo cy’igihugu cy’amakoperative,Professeur  Jean Bosco Harelimana,ubwo muri aka karere hizihirizwaga umunsi mpuzamahanga w’amakoperative usanzwe wizihizwa mu cyumweru cya mbere cy’ukwezi kwa Nyakanga ,no guhemba amakoperative yabaye indashyikirwa mu mikorere inoze,aho yagaragarijwe ko muri aka karere hakorera amakoperative 284 yiganjemo ay’ubuhinzi n’ubworozi,ubucuruzi,ubukorikori,uburobyi,ubucukuzi bunyuranye,atanga serivisi,n’andi. 

Umuyobozi w’aka karere wungirije ushinzwe iterambere ry’ubukungu,Ntaganira Josué Michel,yavuze ko muri aya makoperative 284 ahari, afite imikorere myiza ari 159 ahwanye na 55,9%,andi 161ahwanye na 40,8% akaba adigadiga akeneye guhozwaho ijisho ngo imicungire yayo inoge,hakaba andi 9 akora nka baringa cyangwa akiyitirira ko ari yo kandi atari yo n’imikorere idasobanutse harimo n’amwe muri aya yagiye ahagarikwa.

Yaboneyeho gushimira amakoperative amaze kugira aho ageza abanyamuryango aho yatanze urugero rwa koperative y’abahinzi b’icyayi ya COOPTHE Mwaga-Gisakura imaze guteza imbere abanyamuryango bayo 697 ku buryo bufatika,ikaba ngo yararenze imbibi  ikanatera inkunga y’amafaranga andi makoperative menshi akizamuka ngo abashe gutera imbere, n’ibindi,kimwe n’andi makoperative bigaragara ko afite icyerekezo cyiza asaba n’aya akijegajega kuzamura imikorere.

Ati’’  turashimira aya yose akorera abanyamuryango neza uruhare rwayo mu iterambere ry’abayagize n’iry’akarere muri rusange, cyane cyane uruhare rwayo mu kongera umusaruro mu bwiza no mu bwinshi,akaba n’umuyoboro wo kubasha kugeza inyongeramusaruro n’imbuto z’indobanure mu baturage, aho dufite inganda 3 z’icyayi zubatswe n’amakoperative n’izindi 13 za kawa,ayishyuriye abanyamuryango bayo mituweli, gahunda ya girinka,kurwanya ubukene n’ibindi, nkanibutsa ariko ko tutazigera twihanganira na rimwe anyereza umutungo w’abayagize kuko abatesha igihe bayajyamo ntibagire icyo bayakuramo bataye n’igihe cyo kwikorera ibindi.’’

Nyuma yo guhemba ayabaye indashyikirwa muri yo,umuyobozi wa COOPTHE Mwaga-Gisakura yashyikirijwe igikombe cy’ubudashyikirwa, Ngirinshuti Callixte,yabwiye Bwiza.com ko  bagikesha gukorera mu mucyo no kumva ko inyungu z’abanyamuryango atarai inyungu bwite z’umuntu,ngo abarangwa n’imikorere mibi ari ababa bashaka kwigwizaho umutungo w’abanyamuryango.

Ati’’ abayobozi b’amakoperative ni bo baba ba nyirabayazana bo guhomba kwayo kuko iyo batangiye gukorera mu bwiru,kwigwizaho umutungo  no kuyoboresha igitugu abanyamuryango ni ho bipfira,ibyo akaba ari byo twirinze cyane,buri munyamuryango akagira uruhare ku mutungo we ,tukabaha n’ubwasisi,turarenga duteza imbere n’andi twabonaga akeneye kuzamuka,kandi ibyo turimo gukora ubu biruta cyane ibi twahembewe, ubufatanye no gukomeza gukorera hamwe bikazatugeza no kubirenze ibyo dufite ubu.’’

Umuyobozi  mukuru wa RCA,Professeur Harelimana Jean Bosco avuga ko batazigera bihanganira abashyira akaboko karekare mu mafaranga y’abanyamuryango kuko  ngo bahagurukiwe, aboneraho gusaba uwaba yaragize ifaranga rya koperative anyereza kurigarura inzira zikigendwa, ashima amakoperative y’aka karere akora neza intambwe amaze guteza abanyamuryango mu iterambere,aya ajegajega ayasaba kwikubita agashyi hakiri kare,kuko ngo uzashaka gusubiza inyuma gahunda ya Leta yo kwishyira hamwe kw’abaturage mu makoperative atazihanganirwa.

Aka karere gafite abaturage 273.074 bageze igihe cyo gukora bagakwiye kwibumbira mu makoperative ngo barusheho kwiteza imbere,nyamara abayayobotse ngo ni 163.424 gusa bari ku ijanisha rya 59%, hakaba hagikenewe imbaraga nyinshi n’ubufatanye bwa bose ngo n’uriya mubare usigaye uyagane,binatewe n’imikorere n’iterambere bazaba babona mu bayababanjirijemo.

Amakoperative yasinye imihigo y’umwaka w’imihigo 2019-2020

Izindi wakunda

Bwiza.com
error: Alert: Ntabwo byemewe!!