bwiza.com
Amakuru mu Rwanda

Ababyeyi ba wa musore wakoze umuhanda wa 3km, bahishuye byinshi kuri we

Uyu muhungu Niringiyimana Emmanuel ni imfura yacu, nyina amutwise yaje kumera nk’ugize imibereho mibi ariko nyuma yo kuvuka aza kugira imibereho myiza. Ni umwana wakuranye igikuriro cyiza, yari afite urubavu ruto, ntabwo yakuze kurwaragurika, ntabwo ajya adusuzugura, mbese Imana yaramurinze natwe twese nk’ababyeyi be na barumuna be.

Ibi ni ibyatangajwe n’ababyeyi ba Niringirimana Emmanuel, umusore w’imyaka 23 y’amavuko wamenyekanye nyuma yo kumara imyaka itatu akora umuhanda wenyine, uwo muhanda ukaba ufite uburebure bwa Kilometero zikabakaba kuri eshatu.

Reba Video: Icyo Ababyeyi ba Niringiyimana bamuvugaho

Ababyeyi b’uyu musore batuye mu Mudugudu wa Gisovu, Akagari ka Nkoto, Umurenge wa Murambi, Akarere ni Karongo, Intara y’Iburengerazuba. Se Nzabahayo Emmanuel ni umusaza, afite ubumuga bwo kutabona, avuga ko ibyo umuhungu akora abikoreshwa n’Imana.

Ashimangira ko uyu mwana we abaye ari ubonye ubufasha yakomeza kwiga, amashuri yacikishirije mu mwaka wa Gatandatu w’amashuri abanza akaba yayakomeza, impano afite akazayikomeza ariko afitemo n’ubuhanga yakuye mu ishuri.

Nyina, Mukamasabo Mariya ati “Kuva mu bwana bwe yari umwana muzima, ntuma akumva, nyuma ageze mu mwaka wa Gatandatu abivamo, twajyaga mu kazi we akavuga ngo ngiye gukora umuhanda wanjye, ati ‘abagenzi bajye banyuramo hameze neza ibihuru bitabafata, umwana arakomeza, arakomeza,…akajya akora umuhanda, numvaga ko umwana ari umwana n’umurimo we umurimo”.

Uyu mubyeyi na we utareba neza, avuga ko ubwo Emmanuel yakoraga uyu muhanda, nk’ababyeyi batigeze bamugora mu gihe abaturanyi bo bavugaga ko yaba afite ikibazo cyo mu mutwe, barizera ko Imana ishobora kuzabahindurira amateka n’uyu musore wabo agakomeza amashuri.

Reba Video: Niringiyimana arasobanura byinshi, n’icyamuteye gukora uyu muhanda

 

Izindi wakunda

Bwiza.com
error: Alert: Ntabwo byemewe!!