bwiza.com
Amakuru mashya

Gen. Tumukunde  ku bavuga ko iyirukanwa rya Gen. Kayihura hari aho rihuriye n’u Rwanda

Uwahoze ari Minisitiri w’Umutekano wa Uganda, Rtd. Lt. Gen. Henry Tumukunde yagize icyo avuga ku byagiye bivugwa ko iyirukanwa rya Gen. Kayihura ryaba rifitanye isano n’u Rwanda.

Gen. Kayihura  yirukanwe ku mwanya w’Umuyobozi wa Polisi ya Uganda (IGP) muri Mata 2018.

Muri Kamena, yatawe muri yombi agezwa imbere y’inkiko ashinjwa gushimuta impunzi z’Abanyarwanda akazohereza mu Rwanda.

Ni ibyaha atahwemye guhakana. Kuri ubu aridegembya ariko akaba ategetswe kwitaba urukiko.

Mu kiganiro n’ikinyamakuru cya Leta, The New Vision, Gen Tumukunde yarebanye ay’ingwe na Gen. Kayihura wahoze ayobora igipolisi mu gihe we yari minisitiri w’umutekano.

Mu magambo ye, agaragagara nk’udashaka guhuza Gen Kayihura n’u Rwanda gusa akagira icyo avuga ku Rwanda.

Ati “ Abanyarwanda bafite igihugu cyabo. Natwe dufite icyacu. Akazi kanjye kari ako kurengera Uganda. Reka tuvuge nta kurya iminwa, buri wese ukorera muri iki gihugu agomba kubaha inzego zacyo; ubuyobozi n’igihugu.”

Yongeyeho “ Kuri njye, ibi ni ingenzi. Abanyayuganda ubu barubashywe. Sinshaka ko dusubira muri bya bihe aho badushyiraga ku ruhande kuko dufite pasiporo za Uganda.”

Uyu mugabo avuga ko Gen. Kayihura hari byinshi yakoreye polisi ya Uganda ariko ko yatumye habaho ikibazo cyo kutubahiriza amategeko.

Avuga ko byari ikibazo kubona polisi yishingikiriza abasivili mu bikorwa by’ubutasi.

Gen. Tumukunde aributsa Abanyarwanda bafite igihugu cyabo mu gihe benshi muri aba bagiye batabwa muri yombi bashinjwa kuba intasi muri Uganda. Ni ibyaha batahwemye guhakana bivuye inyuma.

 

 

 

Izindi wakunda

Bwiza.com
error: Alert: Ntabwo byemewe!!