bwiza.com
Ahabanza » The Chainsmokers, Marshmello na C. Harris mu ba-DJs barumbukiwe mu 2019
Amakuru Imyidagaduro

The Chainsmokers, Marshmello na C. Harris mu ba-DJs barumbukiwe mu 2019

Abavanga umuziki (DJs) ni bamwe mu bagira uruhare mu iterambere ry’umuziki cyane ko bari mu bawukina kenshi bagashyiramo n’ubuhanga bwabo. Aka ni ko kazi kabatunze kuva ubwo Jimmy Savile yakoraga igitaramo cya mbere avanga umuziki wa jazz mu 1943.

UmuDJ ashobora gukora igitaramo wenyine kandi akakiryoshya bitewe n’uburyo avanga umuziki buryoheye amatwi.

Abahanzi bamaze kubona ko gukorana umuziki n’abavanga umuziki byakongerera agaciro umuziki wabo, uhereye muri Amerika iwabo w’umuziki, ukagera mu Rwanda.

Duhereye hano mu Rwanda, twabonye DJ Marnaud afatanya indirimbo na DJ Pius mu ndirimbo bise ‘Ribuyu’, DJ Miller afatanya n’abahanzi bahuriye hamwe mu ndirimbo yitwa Iri Joro ni Bae.

Indirimbo zirimo aba-DJ ziba zifite umwihariko wo gukundwa n’abanyabirori n’abandi bantu bakunda indirimbo zibyinitse.

Biragoye cyane kumva indirimbo irimo umuvanzi w’umuziki ituje. Tujye muri Amerika n’i Burayi turebe indirimbo zirimo DJ Snake, DJ Khaled, The Chainsmokers, Calvin Harris n’abandi. Ni indirimbo zigera aho zihagurutsa umuntu ukunda umuziki, akabyina. Urugero ni indirimbo yitwa Closer ya The Chainsmokers na Halsey, Let me love you ya DJ Snake na Justin Bieber, Wild Thoughts na No Brainer ya DJ Khaled na This Is What You Came For ya Calvin Harris.

Uyu murimo w’abavanzi b’umuziki urabatunze ndetse ubinjiriza amafaranga menshi cyane ku buryo na bo babarirwa mu baherwe.

Turebere hamwe uru rutonde n’uko binjije muri uyu mwaka. Ni urutonde dukesha urubuga rwa Forbes Magazine; ikinyamakuru gikora intonde ku byamamare bitandukanye.

15. DJ Snake: Yitwa William Sami Étienne Grigahcine. Ni Umufaransa. Yinjije amadolari y’Amerika miliyoni 11.5 ($11.4m).

14. Afrojack: Ubusanzwe yitwa Nick van de Wall. Ni Umuholandi. Yinjije $12m.

13. Alesso: Yitwa Alessandro Lindblad. Ni umunya-Swede. Yinjije $12.5m.

12. Skrillex: Yitwa Sonny John Moore. Ni Umunyamerika. Yinjije $13 m.

11. Kaskade: Yitwa Ryan Gary Raddon. Ni Umunyamerika. Yinjije $14 m.

10. Armin van Buuren: Yitwa Armin Jozef Jacobus Daniël van Buuren. Ni Umuholandi. Yinjije $15m.

9. Zedd: Yitwa Anton Zaslavski. Afite ubwenegihugu bw’Ubudage n’Uburusiya. Yinjije $17m.

8. David Guetta: Yitwa Pierre David Guetta. Ni Umufaransa. Yinjije $18m.

7. Martin Garrix: Yitwa Martijn Gerard Garritsen. Ni Umuholandi. Yinjije $19m.

6. Tiësto: Yitwa Tijs Michiel Verwest. Ni Umuholandi. Yinjije $24 m.

5. Diplo: Yitwa Thomas Wesley Pentz. Ni Umunyamerika. Yinjije $25m.

4. Steve Aoki: Yitwa Steven Hiroyuki Aoki. Ni umunyamerika. Yinjije $30m.

3. Calvin Harris: Yitwa Adam Richard Wiles. Ni Umunya-Scotland. Yinjije $38.5m.

2. Marshmello: Yitwa Christopher Comstock. Ni Umunyamerika. Yinjije $40m.

Avanga umuziki yahishe mu maso

1. The Chainsmokers: Ni itsinda ry’Abanyamerika babiri ari bo Alex Pall na Andrew Taggart. Ryinjije $46m.

 

Izindi wakunda

Bwiza.com