bwiza.com
Amakuru Ubuzima

Dukwiye kwishakamo igisubizo cyihuse kugira ngo turandure Virusi itera Hepatite C- Mme. Jeannette Kagame

Ku mugoroba wo ku wa Gatatu tariki ya 31 Nyakanga 2019, ubwo Madamu Jeannette Kagame yifatanyaga na Minisiteri y’ubuzima, Urugaga rw’abikorera n’izindi nzego muri gahunda y’igihugu yo kurandura indwara y’umwijima (Hepatite C), yavuze ko hakwiye kwishakamo ibisubizo ikarandurwa burundu.

Ni umuhango wabereye muri Kigali Convention Centre, Madamu Jeannette Kagame akaba yashimiye abateguye iki  gikorwa, ko ari icy’ingenzi mu kwibutsa kongera gutekereza ku Munyarwanda ufite roho nzima mu mubiri muzima, akabaho neza, atekanye mu Rwanda rwifuzwa.

Umufasha wa Perezida wa Repubulika arasaba guhuza imbaraga kugira ngo iyi ndwara irandurwe burundu. Yagize ati “Birumvikana rero, dukwiye kwishakamo igisubizo cyihuse, gishoboka kandi kirambye; kugira ngo Turinde, Tuvure kandi Turandure Virusi itera Hepatite C. Tugira amahirwe nk’Abanyarwanda ko ubuyobozi bw’igihugu cyacu bwatekereje uburyo bwihuse bwo gufasha Abanyarwanda kwisuzumisha no kwivuza. Bityo umaze kumenya ko afite Virusi ya Hepatite C afashwa kubona imiti ku gihe”.

Yakomeje avuga ko ubuyobozi bw’u Rwanda butaciwe intege n’uko kwivuza indwara ya Hepatite C byari bigoye cyane, kuko umuti wabonetse utinze, naho ubonekeye ngo uboneka uhenze cyane.

Ati “Turishimira ko ubu Abanyarwanda bafite uburyo bwo kwivuza indwara ya Hepatite C ku giciro kiri hasi, ugereranyije n’ahandi ku isi”.

Muri ya mitekerereze y’uko ubukungu bukomeye bwa mbere bw’u Rwanda ari Abanyarwanda, Madamu Jeannette Kagame yashimiye ubuyobozi bw’Igihugu, ngo bwibutsa iteka abaturage ko bakwiye gushyira hamwe, kugira ngo bakomeze gusigasira ubwo bukungu.

Yasabye  Abanyarwanda gukomeza gushyira hamwe mu gukomeza kubaka u Rwanda rwifuzwa ndetse haharanirwa ko Umunyarwanda agerwaho na serivisi zose z’ubuzima.

Iyi ndwara ya Hepatite C yandura mu gihe uhuye n’amaraso cyangwa andi matembabuzi yanduye, ibi bishobora kuba mu gihe uri guhabwa amaraso, uri guterwa imiti cyangwa ibindi bikoresho byanduye, ishobora kandi kwandurira mu mibonano mpuzabitsina nubwo atari kenshi biba, kugira indwara zandurira mu mibonano mpuzabitsina, kuryamana n’abantu batandukanye biri mu bishobora kukongerera ibyago byo kwandura ubu bwoko bwa hepatite.

Abashakashatsi bavuga ko ngo kubera ko ibimenyetso bya hepatite C bitinda kugaragara iyo itaragera ku rwego rwo kuzahaza umuntu, iyi ndwara ntiwamenya ko runaka ayirwaye kuko umuntu ashobora kuyimarana igihe kinini atazi ko ayifite kuko itangira kugaragara hagati y’imyaka 15 na 30 umuntu ayanduye.

Ku Isi, abarenga milliyoni 180 bafite virusi itera hepatite C yabaye akarande (Chronique) kuri bo. Ishami ry’umuryango w’abibumbye ryita ku buzima (OMS) rivugako hafi 500,000 bicwa na hepatite C buri mwaka.

Mme Jeannette Kagame avuga ko hakwiye ubufatanye mu kurandura Hepatite C

 

Izindi wakunda

Bwiza.com
error: Alert: Ntabwo byemewe!!