bwiza.com
Ahabanza » Nyamasheke: Ubuyobozi bwemeza ko hari abafatanyabikorwa b’Akarere bakora nka banyamwigendaho
Amakuru Ubukungu

Nyamasheke: Ubuyobozi bwemeza ko hari abafatanyabikorwa b’Akarere bakora nka banyamwigendaho

Ubuyobozi bw’akarere ka Nyamasheke buvuga ko kuba kano karere kagaragaramo abafatanyabikorwa benshi nyamara kakarenga kakaba ari ko gakennye cyane mu gihugu,hakaba n’imihigo imwe idindira, biterwa no kuba hari ugutatanya imbaraga kwabo, ugasanga ibikorwa byabo bisa n’ibyirunda ahantu hamwe ahandi ntabyo, cyangwa hari abakora bimwe  batanaziranye buri wese akora byiza ariko bidakwira hose kubera kubura uguhuza ingufu,nyuma yo kubisuzuma neza,abafatanyabikorwa bakaba barasabwe guhuza imbaraga ngo babashe gukura abaturage mu bukene.

Mu biganiro byimbitse akarere gaherutse kugirana n’aba bafatanyabikorwa iki kibazo cyaragarutse aho benshi bibazaga ukuntu gakomeza kubanziriza utundi mu bukene bukabije nyamara hari utundi turere batangaho n’ingero tutagombye kubajya imbere ugereranije n’amahirwe y’iterambere aka karere gafite,aramutse akoreshejwe neza buri muturage yagira imibereho myiza, nyuma yo kwisuzuma ubwabo basanga hari ibyo batajyaga batunganya bagiye kwitaho ngo ibi byose bihinduke.

Aganira na Bwiza.com nyuma y’ibi biganiro n’abafatanyabikorwa bose b’aka karere, umuyobozi wako  wungirije ushinzwe iterambere ry’ubukungu Ntaganira Josué Michel,yavuze ko ubukene aba baturage barimo atari umurage kandi ko kuba karimo ikiyaga cya kivu,pariki y’igihugu ya Nyungwe,umuhanda Kivu belt ugakingurira amarembo yo guhahirana n’ibindi bice byose by’igihugu,kuba ari ko ka mbere mu gihugu kera kawa nyinshi kakagira n’inganda z’ibyayi zikora neza,ibikorwa by’ubukerarugendo n’ibindi byakabyajwe umusaruro ukiza abaturage ariko bitawubyara uko bikwiye bakwiye kwisuzuma ubwabo.

Ati’’ uretse n’ibi Imana yaduhaye byagakwiye kutubera isoko y’ubukire,hari n’abafatanyabikorwa benshi mu iterambere dufite barimo imiryango mpuzamahanga n’indi yo mu gihugu ihakorera, hari abikorera ku giti cyabo n’abandi bashobora kudufasha mu iterambere, ariko wasangaga bakora buri wese ameze nka nyamwigendaho, bamwe n’ibyo bakora ntibakorane bya hafi n’abanyamabanga nshingwabikorwa b’imirenge kandi ari bo bagakwiye kubikurikirana,ari yo mpamvu wasangaga hari ibikorwa bimwe byirunda hamwe ahandi abaturage barira, n’imwe mu mihigo y’akarere ntishyirwe mu bikorwa neza,ibi bikaba bigiye guhinduka.’’

Umuyobozi w’ihuriro ry’abafatanyabikorwa mu iterambere( JADF) muri aka karere Tumusabemungu Jean de Dieu unahagarariye umushinga Hinga weze  ugira uruhare mu kongera ibiribwa mu karere, na we asanga hari byinshi byari bikenewe ngo abafatanyabikorwa b’akarere bagateze imbere koko, birimo gukorera  hamwe no guhuza imbaraga,imihigo y’akarere bakayigira iyabo,buri wese akabazwa ibyo akora aho gukora ibyo yishakiye,ngo bikozwe gutya byahindura byinshi mu mibereho y’abaturage.

Ati’’icyaburaga ni uku guhura tukaganira neza,buri wese akumva uruhare rwe mu iterambere ry’akarere, tukagaragaza ibyo dukora,abakora bimwe bakabikorera ahatandukanye ngo bitirunda hamwe kandi hari n’ahandi bikenewe , hari n’abo wasangaga bahugura abaturage ku bintu runaka ibyabo bigaherera aho gusa ntibajye gukurikirana ngo barebe icyo byatanze,,ariko kubera ko tugiye gukorera hamwe n’abayobozi b’inzego z’ibanze umunsi ku wundi,imihigo akarere gahiga imbere ya Nyakubahwa perezida wa Repubulika twese tukayigira iyacu,nta kabuza tuzatera intambwe ikomeye mu iterambere,n’ahari intege nke tuzajya duhita tuhabonera rimwe,ikibazo tugikemure twihute mu iterambere.’’

Ihuriro ry’abafatanyabikorwa mu iterambere ry’aka karere ribarurirwamo abafatanyabikorwa  batandukanye barimo imiryango mpuzamahanga n’indi yo mu karere, amadini n’amatorero agera kuri 16,inganda n’ibindi bigo bifatanya na Leta,abikorera n’abandi,nyamara ugasanga imirenge yose ikennye yako ivuga ko ikeneshwa n’uko nta mishinga y’iterambere ihagera,aba bafatanyabikorwa  bo bakavuga ko babangamirwa n’ibikorwa remezo bidatunganye nk’imihanda,amashanyarazi n’ibindi bikababangamira, ariko ko ubwo batangiye kubiganiraho byose bari hamwe, bizagenda bikemuka.

Buri wese yiyemeje gutunganya ibimureba bizamura imibereho y’abaturage

Izindi wakunda

Bwiza.com