bwiza.com
Ahabanza » U Rwanda rwarenze ku mabwiriza ya Afurika Yunze Ubumwe na OMS rufunga imipaka iruhuza na Congo
Amakuru mashya

U Rwanda rwarenze ku mabwiriza ya Afurika Yunze Ubumwe na OMS rufunga imipaka iruhuza na Congo

Imipaka ibiri ihuza u Rwanda na Repubulika Iharanira Demokarasi ya Congo uciye mu Karere ka Rubavu yafunzwe kubera icyorezo cya Ebola cyongeye kugaragara mu mujyi wa Goma. Iyi ni ingingo ihabanye n’amabwiriza ya OMS na Afurika Yunze Ubumwe yo kuwa 23 Nyakanga uyu mwaka.

Aya makuru yamenyekanye  mu gitondo cyo kuri uyu wa Kane ubwo abaturage bakorera akazi mu mujyi wa Goma bageragakuri iyi mipaka bagasanga ifunzwe,  nyamara batarigeze babimenyeshwa.

Ku ruhande rw’u Rwanda, aya makuru yemejwe n’Umuyobozi w’ibitaro bya Gisenyi, Lt. Col. Kanyankore William mu kiganiro yagiranye na Igihe.com

Yagize ati “Nibyo imipaka yose yafunzwe, ibindi birenzeho hari itangazo rigiye gusohoka risobanura impamvu byakozwe, mukomeze mutegereze.”

N’ubwo uyu yemeza ko iyi mipaka ibiri yafunzwe, ibi bitandukanye n’ibyari bikubiye mu mabwiriza y’Umuryango wa Afurika Yunze Ubumwe (UA) ndetse n’Ishami ry’Umuryango w’Abibumbye Ryita ku Buzima (OMS) mu itangazo rihuriweho bashyize hanze kuwa 23 Nyakanga 2019.

Muri iri tangazo nk’uko Ibiro Ntaramakuru by’Abashinwa (Xinhua) byabitangaje, nta gihugu na kimwe cyemerewe gufunga imipaka cyangwa gushyiraho ikumira iryo ari ryo ryose ku kujya cyangwa gucuruza n’ibihugu birimo Ebola. UA na  OMS basabaga ko ibihugu byose byakubahiriza aya mabwiriza uko yakabaye.

Iri tangazo ryagiraga riti “ Nta gihugu cyemerewe gufunga imipaka cyangwa gushyiraho ikumira iryo ari ryo ryose ku kujya cyangwa gucuruza n’ibihugu birimo Ebola, ubu ni Congo.”

Iri tangazo rivuga ko ibi byakozwe n’u Rwanda bishobora gutuma habaho  kubangamira ubukungu kandi ko no kurwanya Ebola byarushaho kugorana.

Iri tangazo kandi ryavugaga ko hadakwiye no kwakwa ibyangombwa byo kuba abantu barakikingiwe igihe bashaka kugira iyo bajya.

Riti “ Ntihakwiriye kubaho kwaka ibyemezo byo kuba umuntu yaripimishije Ebola kugira ngo yemererwe kujya ahantu, cyangwa ngo ahabwe Viza. Kugeza ubu nta rukingo rwemewe rwa Ebola ruhari.”

Ku kijyanye no ku bibuga by’indege byo muri Congo-Kinshasa, ibijyanye no gusuzuma (screening) abasohoka byakorwa n’ibihugu bituranyi (birimo n’u Rwanda)  ngo si ihame cyane ko ngo “Bitwara amikoro menshi kandi nabyo bikaba bitizewe.”

U Rwanda rufunze imipaka yarwo ruhana na Congo- Kinshasa nyuma yaho abantu babiri bahitanwe na Ebola mu Mujyi wa Goma.

Iyi ndwara kuva yakwaduka muri Congo imaze guhitana abasaga 1700.

Imipaka yafunzwe ari yo; umupaka muto wa Petite Barrière muri Rubavu usanzwe unyurwaho n’abantu ibihumbi 55 ku munsi mu gihe uwa Grande Barrière ucaho abantu 7 000 ku munsi.

 

Izindi wakunda

Bwiza.com