bwiza.com
Amakuru Amateka n'umuco

Nyamasheke/ Ruharambuga: Igitaramo cy’umuganura cyabaye n’umwanya wo kugaragaza ibyo bigejejeho

Abaturage b’umurenge wa Ruharambuga mu karere ka Nyamasheke baravuga ko ibyo  bigejejeho ubwabo ntawe bategeye amaboko byerekana ko iyo imbaraga zishyizwe hamwe byose bishoboka.

Ni bimwe mu byagaragarijwe abaturage b’uyu murenge ubwo bizihizaga igitaramo cy’umuganura ku mugoroba w’uyu wa 1 Kanama 2019, cyanabaye icyo kwesa imihigo no guhiga indi.

Umunyamabanga nshingwabikorwa w’uyu murenge,  Dukuzumuremyi Anne-Marie yavuze ko ubumwe bwabo no kumva ko nta wundi basiganya iterambere ry’umurenge wabo nk’ishema ryabo ari byo byabagejeje ku kwesa imihigo.

Ati “Mu gitaramo cy’umuganura twaboneyeho no gushimira byimazeyo abaturage, abafatanyabikorwa bacu n’abayobozi kuva ku mudugudu ibyagezweho mu mwaka w’imihigo 2018-2019, tunafata ingamba z’ibyo tugomba kugeraho muri 2019-2020, tunishimira ko umwaka turangije imihigo twayesheje ku gipimo cya 97,9% muri rusange, hakaba iyo twishimira ko twesheje ku gipimo cyo hejuru kurushaho.’’

Yakomeje  ati ’’Nk’umuhigo wa mituweli,bwa mbere mu mateka y’uyu murenge twawesheje ku gipimo cya 110%,umwaka ushize, n’uyu tumaze ukwezi kumwe gusa  dutangiye turi ku 101%, bivuze ko nta muturage n’umwe w’uyu murenge utakwivuza igihe yarwaye.

Aha bafunguraga ku mugaragaro umuhanda batanzeho arenga Miliyoni 22

Avuga ko banishimira umuhanda Kigenge-kugera ku kigo nderabuzima cya Kamonyi  mu kagari ka Ntendezi bujuje ubatwaye arenga 22.000.000 z’amanyarwanda wa 1,7km.

Anavuga ko baniyujurije poste de santé mu kagari ka Kanazi,  konyine kari gasigaranye abaturage kwivuriza hafi byari bigoye, ariko ubu ngo inyubako yararangiye,hasigaye amashanyarazi n’ibikoresho bagatangira kwivuza, n’ibindi bikorwa.

Simbarikure Pierre, umuturage washimiwe kuba yarabashije gushyira hamwe bagenzi be barenga 350 mu bimina 13 byo kwizigamira, byatumye babasha kwishyurira mituweli imiryango yabo igizwe n’abantu 800, yabwiye Bwiza.com ko yishimiye ko igikorwa cye cyashimwe.

Ati “Twgiraga abaturage barembera mu ngo cyangwa urwaye yajya kwivuza akishyura 100% kubera kutariha mituweli, birambabaza cyane niyemeza kubabumbira hamwe ya mafaranga dukusanya tukabanza kwishyura mituweli, andi  akadufasha kwikura mu bukene,ubu nta n’umwe ubura uko yivuza,nkaba ngiye gukuba kabiri uyu mubare nkagera no mu tundi tugari, nkanakora ku buryo uyu mwaka uzarangira buri munyamuryango afite nibura amatungo 2 magufi kandi tuzabigeraho.’’

Visi perezida wa njyanama y’aka karere, Ndashimye Léonce, yabashimiye kuba bumva neza gahunda ya Leta yo kwigira no kwihesha agaciro, abasaba kudasubira inyuma no guhora ari icyitegererezo mu bandi, umuganura ukababera isoko yo gukora cyane n’ubutaha bakazagira byinshi baratira abandi bigejejeho.

bana baganuzwa mu gitaramo cy’umuganura

Izindi wakunda

Bwiza.com