bwiza.com
Amakuru Umutekano

Ni mwe nzirakarengane zitahiwe nimudahaguruka ngo dufatanye-Chameleone

Abaturage, abahanzi, abakunzi b’umuziki n’abaharanira uburenganzira bw’ikiremwamuntu bababajwe n’urupfu rw’umuhanzi wo muri Uganda, Michael Alinda wamenyekanye nka Ziggy Wine, nyuma yo gukubitwa bikomeye n’abantu bataramenyekana.

Ziggy Wine yashimuswe mu cyumweru gishize, ku wa gatandatu tariki ya 3 Kanama yabonetse mu mugi wa Kampala hari hashize iminsi itatu. Yari yavanywemo ijisho ry’ibumoso ndetse yakaswe n’intoki ebyiri ku kiganza cy’iburyo. Abamukubise bamusize ku marembo y’ibitaro bya Mulago.

Mu ijoro ryo ku wa 4 rishyira uwa 5 Kanama ni bwo humvikanye inkuru ivuga ko uyu muhanzi amaze gupfa.

Michael Alinda yamenyekanye mu muziki nka Ziggy Wine

Bobi Wine na Jose Chameleone bari mu ishyaka rimwe na Ziggy Wine (People’s Power) bari mu banditse ubutumwa bwihanganisha umuryango, ndetse banagira icyo basaba inzego z’umutekano ndetse n’Ishyirahamwe ry’abahanzi muri Uganda.

Ubutumwa bwa Chameleone

Ni inkuru mbi kandi ibabaje y’umuvandimwe, umusangirangendo n’umuhanzi mugenzi wange, Ziggy Wine. Nabonye amafoto ye ari mu bitaro, nsoma amakuru y’uko byamugendekeye na nyuma yaho (ukuntu yatawe ku muryango w’ibitaro bya Mulago). Ni inkuru ibabaje itwibukije n’abavandimwe batuvuyemo. Ibi bigaragaza ko umutekano muke w’abantu wiyongera mu gihugu.

Turebwa cyane n’ibi bikorwa byibasira abantu b’inzirakarengane, tukanasaba polisi kuzana abakoze aya mahano cyane ko ‘camera’ zihari. Turasaba abahanzi kumva ko turi abavandimwe, tugahagarara twemye. Buri mwaka dutakaza abahanzi mu buryo bumwe.

Ubuyobozi buduhagarariye nk’ishyirahamwe riharanira inyungu n’uburenganzira by’abahanzi muri Uganda rigomba kugaragaza uruhare rwaryo mu gushakira umuti ikibazo cya Ziggy Wine. Ni mwe nzirakarengane zitahiwe nitudahaguruka ngo twifatanye. Dusengere Ziggy, Imana igukomeze n’umuryango wawe. 

Nta mutekano, nta cyerekezo. 

Umuvugizi wa polisi ya Uganda, Fred Enanga yatangaje ko abashimuse bakanakubita Ziggy batangiye gushakishwa ariko impamvu yabibateye ntiramenyekana.

Izindi wakunda

Bwiza.com