bwiza.com
Ahabanza » Ibyiciro bishya by’Ubudehe byagombye gutandukanywa n’inkunga zihabwa abatishoboye-TIR
Amakuru mu Rwanda

Ibyiciro bishya by’Ubudehe byagombye gutandukanywa n’inkunga zihabwa abatishoboye-TIR

Umuryango urwanya ruswa n’akarengane Transparency International Rwanda wifuza ko ibyiciro by’ubudehe biri kuvugururwa, bitazakomeza gushingirwaho hatangwa inkunga zihabwa abatishoboye, cyane ko nta muntu ubaho adakeneye inkunga.

 Mu kiganiro n’abaturage b’umurenge wa Mukura mu karere ka Huye, uyu muryango werekana ibyifuzo by’abaturage byavuye mu bushakashatsi bugamije gukusanya ibitekerezo ku mivugururire y’ibyiciro by’ubudehe. Ikindi ni uko hashobora kuba amakosa mu gushyira abaturage mu byiciro, ikosa ribaye rigakurikirana uwarikorewe yimwa inkunga akeneye.

Ni mu rwego rwo kureba niba nta bindi bifuza byakongerwa ku byiciro by’ubudehe bitanu by’agateganyo (ubu bitaremezwa) byashyizweho haherewe ku byifuzo by’abaturage. Ni ibitekerezo byakusanijwe mu turere icyenda,  mu mirenge 45, TIR iganira n’amatsinda y’abaturage 225.

Zimwe mu nkunga zigomba gutandukanywa n’ibyiciro bishya, hagarukwa cyane ku kubona inguzanyo yo kwiga kaminuza, kugaburirwa ku ishuri, guterwa inkunga n’abagiraneza, guhabwa ubufasha mu by’amategeko ( amagarama y’urubanza, kunganirwa mu mategeko), guhabwa inyunganira mirire ku bana n’abagore batwite, kwimurwa mu manegeka, kwishyura cyangwa gushumbusha abahuye n’ibiza, n’ibindi. 

Mukakinani speciose wo mu murenge wa Gishamvu, ashimira TIR ko yatumye abagire babigiramo uruhare runini.

Anenga kandi uko byakorwaga mbere bikazamo amakosa, ati, “mbere amakuru yatangwaga nabi, ugasanga baravuga ko ufite inzu kandi idafatikantube ukibashije gusanirwa cyangwa ngo uhabwe amabati. Ikindi byabuzaga abana bacu amahirwe yo kwiga, umwana wawe yatsinda ntabashe kujya muri kaminuza”.

Hari impamvu zatuma n’ushoboye gukora aterwa inkunga 

Haherewe ku bizagenderwaho mu gushyira abantu mu byiciro, hari abibajije niba imiryango irimo abantu bafite ubumuga itashyirwa mu cyiciro cya mbere yose, kimwe n’imiryango ikennye itarimo umuntu n’umwe ushoboye gukora.

Iyi ni igizwe n’abarengeje imyaka 65 n’abari munsi ya 18 cyangwa abamugaye. Imiryango irimo abarwaye indwara zikomeye zidakira nayo yakwitabwaho, kubera ko akenshi kwita ku muntu ufite ubumuga bituma badakora.

Ibi bigarukwaho na Hakundimana Michel wo mu murenge wa Kigoma ati “Ni byiza kuko bizashyira abantu ku murongo, igihe bahawe inkunga runaka bayikoreshe neza, ariko hari imiryango iba irimo abashoboye gukora, ikagira impamvu zindi. Nk’ubu hari umubyeyi ufite umwana ugira uburwayi bwo mu mutwe. Uwo ntabasha gukora kubera guhora amucunga”.

Abandi banavuga ku bantu bafite imiryango migari, ushoboye gukora ari umwe. Urugero ni nk’umunyonzi ufite abana batanu, kandi abana na nyina mu rugo. Uyu basaba ko yagenerwa ubundi bufasha kuko atabasha gutunga umuryango w’abantu umunani anyonga igare gusa.

Philomène Uwizeyimana wo mu Murenge wa Mukura ati “Imbaraga zirahari, akazi ako ari ko kose twagakora, ariko tukabona mituweri n’abana bakabona ibyo kurya, twakoze, tudasabirije, kuko iby’ubuntu si byiza. Hanyuma abakecuru badafite imbaraga bakaba ari bo bahabwa mituweri n’ingoboka”.

Iby’inkunga na serivisi zitangwa hashingiwe ku byiciro by’ubudehe, byari biherutse kuganirwaho mu kiganiro Urubuga rw’itangazamakuru; aho inzego zinyuranye zamaganye iyi mikorere.

TIR: “ibyiciro by’ubudehe ntibyagombye gushingirwaho n’abatanga serivisi zinyuranye, abaterankunga, amashuri n’ibindi kuko byimakaza akarengane”, Mupiganyi, umuyobozi nshingwabikorwa

MINALOC:  “buruse nitangwe hashingiwe ku manota aho gushingira ku byiciro by’ubudehe; Mituweli ishingire ku bushobozi bw’umuturage”, Sheikh Bahame 

LODA: “ ntituzi aho ONG zakuye amabwiriza yo kugendera ku byiciro by’ubudehe zireba abo zifasha, ariko nazo kubera ko zitabasha gufasha bose, zibigenderaho ngo zirebe abagenerwabikorwa bakeneye inkunga”, Gatsinzi Justin 

Umuturage: “ntibikwiye ko icyiciro cy’ubudehe gishingirwaho mu gutanga serivisi runaka nka buruse cyangwa  ibindi, hakwiye gushingirwa ku zindi mpamvu zizwi. Guhabwa imfashanyo iyo ariyo yose ntibikwiye gushingira ku byiciro by’ubudehe”, Habumugisha Vincent, Nyamasheke.

 

Izindi wakunda

1 Igitekerezo

Innocent 09/08/2019 5:43 pm at 5:43 pm

Wenda ahari! Ariko uretse akrengane ninde wabona amfaranga yo kwishyura kaminuza ngo nukubera icyiciro iki n’iki? Ababaga mu cya gatatu bavutswa ayo mahirwe uzi ukuntu bangana?

Subiza

Tanga Igitekerezo

Bwiza.com