bwiza.com
Ahabanza » Uganda: Maj. Gen. Aloys Muganga ayoboye inama itegura imyitozo ya Ushirikiano Imara ku nshuro ya 12
Amakuru Politiki

Uganda: Maj. Gen. Aloys Muganga ayoboye inama itegura imyitozo ya Ushirikiano Imara ku nshuro ya 12

Itsinda ry’abasirikare, abapolisi, abacungagereza n’abasivili ryaturutse mu Rwanda ryitabiriye inama y’Umuryango wa East Africa I Kampala igiye gutegurirwamo imyitozo y’ingabo zo mu bihugu bigize umuryango iteganyijwe mu Ugushyingo I Jinja.

Iyi myitozo igamije kureba uko izi ngabo ziteguye kuba zahangana n’ibibazo bitandukanye byavuka nk’iterabwoba, izabera mu kigo cy’ubutabazi bwihuse cy’Ishuri rya gisirikare.

Itangazo ryashyizwe ahagaragara n’Igisirikare cya Uganda, UPDF, kuri uyu wa Kabiri, riravuga ko iyi nama y’iminsi itatu iri kubera muri hotel yitwa Silver Springs iherereye Bugolobi kandi abahagarariye ibihugu bitandatu bigize EAC bayitabiriye.

Maj. Gen. Aloys Muganga niwe uyoboye iyi nama

Iyi nama igamije gupanga iyobowe n’Umunyarwanda, Major Gen. Aloys Muganga utangaza ko mu bintu byigwaho harimo kureba ibikoresho bikenewe no gusubiramo ingengabihe. Inama nk’iyi ya mbere yabaye yemeranyijwemo kuzakora iyi myitozo mu Ugushyingo 2019 nk’uko itangazo rikomeza rivuga.

Iyi nama ije mu gihe u Rwanda na Uganda bitarebana neza ariko Perezida Museveni akaba aherutse gutangaza ko ibibazo biri hagati y’ibihugu byombi bizabonerwa umuti vuba nk’uko Daily Monitor dukesha iyi nkuru ibyibutsa.

Iyi myitozo yahawe izina rya Ushirikiano Imara izaba ibaye ku nshuro ya 12, ikazahuriramo u Rwanda, Uganda, Tanzania, u Burundi, Kenya na Sudani y’Epfo.

 

Izindi wakunda

Bwiza.com