bwiza.com
Amakuru Politiki

Rusizi: Abagororwa 53 bakoze Jenoside basabye imbabazi ku mugaragaro abo bahemukiye

?

Abagororwa 53 barimo 48 bafungiye muri gereza nkuru ya Rusizi n’abandi 5 bafunguwe, bose baregwa kwijandika muri Jenoside yakorewe abatutsi basabye imbabazi ku mugaragaro imiryango yayirokotse biciye abantu, bikaba byabereye muri Stade y’akarere ka Rusizi, aho basabwe gukangurira bagenzi babo bacyinangiye cyangwa batarumva nza iyi gahunda kuva ku izima na bo bagatera iyi ntambwe kugira ngo barusheho kubaka umuryango nyarwanda.

Padiri Ubald Rugirangoga,umurinzi w’igihango ku rwego rw’igihugu wanatangije iyi gahunda yo gusaba imbabazi no kuzitanga yabashimiye kuba baraganje inabi yari muri bo bagahitamo gusaba imbabazi abo bahemukiye ngo batsindishe iyo nabi ineza n’imiryango yabo bayiruhure ireke kugendana ikidodo mu mitima cy’ibyo bo bakoze itanabibatumye, avuga ko uru ari urugendo rutoroshye,ariko yizera ko nubwo hatangiye bake, bagiye kuba benshi cyane kuko bagenda babyumva.

Harelimana Jean Bosco wari konseye w’icyari segiteri Nyakanyinya mu gihe cya Jenoside, wanakatiwe gufungwa burundu,avuga ko yabanje kwanga kwica abatutsi ariko yajya mu nama yari yateguwe n’abamukuriye bakamugaya ngo ari kwitwara nabi ashyigikira inyenzi,ngo kuki we adakora nk’abandi, ahita atangira kwica no kwicisha abatutsi yari ashinzwe kuyobora,ubu akaba asaba ko,nyuma yo gusaba imbabazi uwo yicishirije umugabo,yahabwa n’amahirwe yo gusubira iwabo aho yari ayoboye agasaba imbabazi abaturage bose ngo ni bwo yakumva aruhutse mu mutima,akabasha gusinzira neza,akanavuga ko agiye gushishikariza bagenzi be bacyinangiye guhinduka.

Abayobozi ku nzego zitandukanye n’abihaye Imana bitabiriye iki gikorwa.

Umugore we Mukandutiye Emérance,avuga ko ashengurwa umutima no kuba ubwo bwicanyi umugabo yakoraga bwose yarabumuhishaga, kuko ngo hari abatutsi umugore yari ahishe mu nzu banahamaze igihe ntabakoreho akibwira ko uko azinduka agenda ibyo kwica no kwicisha abo ayobora atabijyamo, akaba yarabimenye undi yanditse ibaruwa isaba imbabazi, akavuga icyakora ko na we byamuruhuye kuko yari yarishyizemo abaturanyi ko bamufungishirije umugabo yitaga umwere,akishimira ko ubu babanye neza mu gihe batanasuhuzanyaga.

Kamugwera Françoise wo mu murenge wa Bushekeri muri Nyamasheke, wiciwe umugabo n’abana 8 akanamugazwa n’abacinyi bamuhondaguriye mu kiliziya aho yari yahunguye kuri paruwasi gatulika ya Nyamasheke, na we ngo ashengurwa cyane n’uko uwo bari barabyaye muri batisimu ari we wamwiciye umukobwa wari umaze ukwezi kumwe gusa ashyingiwe,na we akamuhamagara ngo asohoke agira ngo ni impuhwe amufitiye na ho ngo yagiraga ngo na we amwice ariko Imana ikinga ukuboko, akavuga ariko ko yamubabariye ndetse ku bwe yakwifuza ko yanafungurwa, agasaba n’abandi bishi gutinyuka bagasaba imbabazi abo biciye abantu bakanabamugaza.

Abayobozi n’abiyahe Imana banyuranye bitabiriye iki gikorwa.

Komiseri Bosco Kabanda wari uhagarariye komiseri mukuru w’urwego rw’igihugu rushinzwe imfungwa n’abagororwa,yavuze ko uku gusaba imbabazi kutagomba kurangirira gusa ku bazitanga n’abazihabwa,ko n’imiryango y’abazisaba bigomba kuyigeraho na yo ikagaragaza uko yabyakiriye n’uko yababariye umuntu wayo wijanditse muri ayo mahano,cyane cyane ko imwe iba yarasigaranye urwikekwe ko umuntu wabo yafungiwe ubusa ikamenya ukuri, anavuga ko iki ari igikorwa gikomeye cyane kigomba gukwira hose.

Umunyamabanga nshingwabikorwa wa komisiyo y’igihugu y’ubumwe n’ubwiyunge,Fidèle Ndayisaba yashimiye komisiyo y’ubutabera n’amahoro ya Diyoseze gatulika ya Cyangugu anavuga ko yifuza ko abazisaba bakwiyongera.

Ati’’twifuza ko bakwiyongera ariko n’abatarateye iyi ntambwe bakiri muri gereza,nibagera hanze bazasanga izindi gahunda zishobora kubafasha guhinduka.’’

Iki ni icyiciro cya 2 gisabye izi mbabazi nk’uko bivugwa na padiri Niragire Valens,umuyobozi wa komisiyo y’ubutabera n’amahoro muri iyi diyoseze,aba mbere 18 babikoze muri 2017, Musenyeri Céléstin Hakizimana,umushumba wa Diyoseze gatulika ya Gikongo akaba n’umuyobozi w’iya Cyangugu, yavuze ko bagiye kurushaho gushikariza n’abandi basigaye kugana iyi nzira, kuko ababikoze bamaze kuba 71 gusa,mu barenga 1500 bafungiye iki cyaha muri iyi gereza,aba bakaba bakiri bake cyane.

 

Abaturage b’uyu murenge bavuga ko ibintu nk’ibi ari ubwa mbere babyumva iwabo.
Aba bagororwa bandi ni abiyemeje ko na bo bagiye gutangira uru rugendo rw’ubumwe n’ubwiyunge basaba imbabazi ku mugaragaro abo bahemukiye.

 

 

Izindi wakunda

Bwiza.com