bwiza.com
Amakuru Politiki

Rusizi: Abigisha ijambo ry’Imana basabwe kutarigoreka bagamije indonke

Ubuyobozi bw’ishuri rya Bibiliya EMAUS ku rwego rw’igihugu buvuga ko bibabaje kubona hari bamwe mu bavuga ko ari abavugabutumwa usanga barabaye nk’indiri y’ubujura bushukana,aho usanga aho kwigisha ijambo ry’Imana n’akamaro karyo mu bantu ,biyigishiriza inyigisho zigamije kubasaruramo amafaranga.

Byavuzwe ubwo abapasiteri n’ababwirizabutumwa mu matorero ya gikirisitu atandukanye bagera ku 10 bahabwaga impamyabushobozi zijyanye no kwigisha neza ijambo ry’Imana, byabereye ku itorero  Inkuru nziza mu mujyi wa Rusizi, bikaba bikorwa mu rwego rwo kugera ikirenge mu cya Leta isaba ko uwigisha ijambo ry’Imana, umuyobozi w’idini cyangwa itorero rya gikirisitu agomba kuba hari urwego ariho rw’amashuri y’iyobokamana kugira ngo yigishe koko ibifasha abantu.

Aganira na Bwiza.com nyuma yo kubaha izi mpamyabushobozi, umuhuzabikorwa w’iri shuri ku rwego rw’igihugu, Past Muhire Samuel yavuze ko yifuza ko abazihawe bakwigisha neza ijambo ry’Imana nk’abaryize koko,kuko  bahawe ubumenyi bufatika bubibashoboza bagatandukana n’abigisha bamwe muri iki gihe,cyane cyane ab’amatorero avuka ubu, usanga biyigishiriza ibitangaza no gukuramo abaturage amafaranga bagamije indonke n’inyungu zabo bwite,aho usanga nk’umuyobozi w’itorero runaka aba agenda mu modoka ihenze  nyamara we n’abo ayoboye basengera mu bukode cyangwa akazu kadafashije, aho kureba inyungu rusange akareba ize gusa.

Abahawe izi mpamyabushobozi basabwe kwigisha ukuri kw’ijambo ry’Imana

Avuga ko ibi ari bimwe mu byateye Leta gutangira gukurikiranira hafi inyigisho zitangirwa mu madini n’amatorero atandukanye no kutihanganira abasengera ahadashobotse, abayobozi b’amadini n’amatorero bakagomba kuba barize kugira ngo batange ibifatika aho kubyuka umuntu ashaka gukira ubushomeri agashinga itorero agatangira kubeshya abaturage ko akora ibitangaza binyuranye birimo gukiza abarwayi,kuvura ubugumba n’ibindi kugira ngo bamuyoboke,atangire kubacuza utwabo.

Ati’’birababaje kuba muri iki gihe usanga abanyamadini n’amatorero benshi bigisha amafaranga kuruta agakiza, bigaterwa ahanini n’abagenda bava mu matorero basengeragamo bagashinga andi, kugira ngo bayobokwe bakavuga ko bakora ibitangaza,ari ho hanaziramo gutera abaturage ubwoba bababwira ko nibadatanga amaturo atubutse cyangwa nibatanga ibiceri Imana ibica,..”.

Pasiteri  Sezibera Phénias ubimazemo imyaka 40, n’imyaka 15 ayobora itorero inkuru nziza mu turere twa Rusizi na Nyamasheke,asanga nubwo amaze iki gihe cyose, hari ibyo akeneye ngo abashe kuyobora neza abo ashinzwe, ari yo mpamvu na we yiyemeje kwiga neza Bibiliya.

Ati’’ ni byo isi iragenda ihinduka abantu bazana inyigisho z’ubuyobe zo kubacuza utwabo aho kubereka Imana y’ukuri,hakaba n’abavuga ko bayoboye abandi mu ijambo ry’Imana batanarizi,ari umurongo umwe wa Bibiliya gusa bafashe bagenda bigisha ahasigaye bagatangira kubwira abantu amaturo no gutanga amafaranga ngo ni bwo bazabona ijuru, ariko twe twiga ngo twigishe ibizima.’’

Tuyishime Josiane wo muri EAR/Diyoseze ya Cyangugu, avuga ko yari asanzwe yigisha anabwiriza abandi ijambo ry’Imana ariko nta gihamya ko yaryize,kuba abiboneye impamyabushobozi ngo agiye kuyikoresha ahindura imitima ya benshi bakiri mu bibi, agasaba n’abandi bagore bafite inyota yo kugaburira abandi ijambo ry’Imana kuza kwiga bakigisha ibyo bize.

Kuva muri 2012 ishuri rya EMAUS mu turere twa Rusizi na Nyamasheke rimaze gusohora abigisha b’ijambo ry’Imana 48 barimo abagore 3,umuyobozi waryo Pasiteri Zirimabagabo Emmanuel,akavuga ko byatanze umusaruro munini cyane kuko wasangaga mbere abantu bigisha batomboza gusa,ariko ubu bakaba bigisha ibyo bize neza n’abigishwa bakigishwa ibitunganye.

Past.Muhire Samuel aragaya abagoreka ijambo ry’Imana bagamije indonke

Izindi wakunda

Bwiza.com