bwiza.com
Ahabanza » Abanyamuryango ba SACCO/ Nyabitekeri barakibaza irengero ry’amafaranga yabo asaga Miliyoni 84
Amakuru Politiki

Abanyamuryango ba SACCO/ Nyabitekeri barakibaza irengero ry’amafaranga yabo asaga Miliyoni 84

Nyuma y’uko igenzura ryakozwe n’ikigo  cy’igihugu cy’amakoperative( RCA) muri Nyabitekeri SACCO mu karere ka Nyamasheke rigaragaje ko miliyoni zirenga 84 z’abaturage bayibitsagamo zanyerejwe, abanyamuryango bayo bavuga ko bakomeje kwibaza amaherezo yabyo n’ukuntu amafaranga yabo azagaruka bagakora bunguka nk’abandi.

Abavugwaho kunyereza aya mafaranga ni uwari umucungamutungo w’iyi SACCO Gombaniro Justin ubazwa 11.846.449,Nahayo Kosima wari umubaruramari  ubazwa 20.393.787,aba bombi bakabazwa andi agera kuri 52.4442.091 bahuriyeho, ngo bakaba bafungwa bagafungurwa bataramaramo na kabiri bigashengura abanyamuryango, Niyokwizerwa Angélique wari ushinzwe inguzanyo abazwa 338.660,Nyiraneza Faina wari umucungasanduka akabazwa 268.800,uwitwa Nyirandayisabye Xavérine we ngo ayo yabazwaga 59.500 ngo yarayishyuye,  aba bandi bo ngo nta n’umwe wigeze anafatwa baracyidegembya bigakomeza kubera urujijo abanyamuryango.

Nyuma y’aho umuyobozi mukuru w’ikigo cy’igihugu cy’amakoperative( RCA) cyanakoze iri genzura kikagaragaza ubu bujura muri raporo yacyo yasohotse muri Gicurasi uyu mwaka,Professeur Harelimana Jean Bosco agendereye akarere ka Nyamasheke  mu munsi mpuzamahanga w’amakoperative ku wa 26 Nyakanga, akongera kumenyeshwa iki kibazo n’ubuyobozi bw’akarere n’uburyo gihangayikishije cyane bwaba ubu buyobozi baba n’abanyamuryango bayo, cyane cyane kuri iri fatwa n’irekurwa rya hato na hato ry’abashinjwa hari n’impungenge ko amaherezo bazacika ubutabera abanyamuryango bagacyura umunyu, Bwiza.com yasubiye muri iyi koperative kuganira n’abanyamuryango.

Bayitangarije ko na bo bafite izi mpungenge,cyane cyane ko ari ikibazo kimaze imyaka 3 bumva ngo abaregwa hafashwe umwe ejo ngo yafunguwe,bugacya ngo yongeye yafashwe bakumva nanone ngo yafunguwe batanamenyeshwa iby’amafaranga yabo uko bizagenda nyamara barumvise ko uyu muyobozi mukuru wa RCA, Professeur Harelimana Jean Bosco yahamirije abaturage, abayobozi ba za SACCO n’andi makoperative ahakorera ko nta we uzaheza umutungo w’abaturage uko yaba ameze kose n’igihe byafata cyose,bakibaza niba aba  bo bitabareba.

Umwe muri bo yagize ati “Natwe twumvise ko byavuzwe kandi ni bo banakoze igenzura bagaragaza buriya bujura ariko dukomeje kwibaza amaherezo yabyo bikatuyobera kandi ikibazo kimaze imyaka 3 yose, banahagaritswe ku mirimo yabo ariko kugeza ubu nta muyobozi n’umwe tubona aza kuduhumuriza ngo atubwire ko umutungo wacu uzagaruka.’’

Yarakomeje ati “Baraduhombeje bitavugwa kuko nk’ubu kuva SACCO yacu yatangira muri 2009 n’ayo twungutse ajya kuziba icyo cyuho tutazi igihe kizarangirira kandi abatuririye ibyacu bidegembya,wenda banayacuruza nta nkomyi, ntitubona ubwasisi nk’abandi,inguzanyo ntituzihabwa uko byakagombye, tukifuza gukurwa mu gihirahiro amafaranga yacu akagaruka tugakora natwe twiteza imbere.’’

Mukarugwiza Floride, Perezida w’inama y’ubutegetsi y’iyi SACCO avuga ko kuri izi mpungenge  hiyongeraho kuba baguza amafaranga menshi mu bindi bigega by’imari nka BDF n’ibindi bakabyungukira menshi bagira ngo babone uko bakora,akavuga ko hakwiye kugira igikorwa kugira ngo  bazabone icyo basobanurira abanyamurayngo mu nteko rusange izaba mu kwakira uyu mwaka,niba amafaranga yabo azagaruka cyangwa atazagaruka,ubutabera bubakure mu gihirahiro kuko ari bwo bwonyine bategereje ariko bakabona bitinda batazi impamvu yabyo.

Abazwa na Bwiza.com kuri iki kibazo, umuyobozi mukuru wa RCA, Harelimana Jean Bosco yari yagize ati “Ngira ngo mumaze kumva abantu benshi tugenda dufata,abakinishije amafaranga ya koperative. Turashaka kuyashyiraho igitinyiro,uzakinisha kuyakoraho ayakoresha mu nyunguze zitari izo yatumwe n’abamushyizeho,uwo,dufitanye amasezerano y’imikorere n’imikoranire n’ababishinzwe,kandi n’abo muvuga ko baba bafunguwe,ntibaba bafunguwe ku buryo bazayaheza,ntibishoboka. Tuzatuza ari uko umutungo wa koperative ugarutse kandi n’abawukinishije babiryozwe.’’

Bwiza.com yagerageje kuvugisha uwari umucungamutungo wayo Gombaniro Justin kuri telefoni ye igendanwa inshuro nyinshi ntiyayitaba, Nahayo Kosima wari umubaruramari we yemera gusubiza ibibazo Bwiza.com yabimubajijeho, aho yavuze ko barekurwa kuko basanga nta kosa bafite, ayo yose babazwa bakavuga ko ari ibyo babagerekaho, icyakora ziriya miliyoni zirenga 52 bahuriyeho akemera ko zaburiwe irengero ariko batagomba kuzibazwa bonyine, abayoboye iyi SACCO bose bagomba kuzibazwa kuko raporo izigaragaza yasohotse muri 2019.

Avuga kandi ko abagenzuye bwa mbere muri 2015 bavuze ko hanyerejwe arenga gato 76.000.000,ubu hakavugwa arenga 84.000.000 akibaza niba igihombo na cyo cyunguka ngo abe ageze kuri aya,ibi hamwe n’ibindi yabazwa ngo yiteguye kubisobanura, ngo abafite impungenge z’uko ifungwa n’ifungurwa rye rya hato na hato ryazamutera gutoroka ubutabera akavuga ko bazishira.

Umuyobozi w’aka karere wungirije ushinzwe iterambere ry’ubukungu,Ntaganira Josué Michel yabwiye Bwiza.com ko na bo nk’akarere bazatuza abaturage bagaruriwe ibyabo.

Izindi wakunda

Bwiza.com