bwiza.com
Ahabanza » Gisagara: Min. Munyakazi yashyize ibuye ry’ifatizo ahagiye kubakwa ibyumba by’amashuri
Amakuru Mu mashuli

Gisagara: Min. Munyakazi yashyize ibuye ry’ifatizo ahagiye kubakwa ibyumba by’amashuri

Umunyamabanga wa Leta ushinzwe amashuri abanza n’ayisumbuye, Dr Munyakazi Isaac yashyize ibuye ry’ifatizo ahazubakwa ibyumba by’amashuri bitatu, kuri GS Gikore, mu Murenge wa Kansi, Akarere ka Gisagara, anatangariza abaturage ko ari mu rwego rwo kugabanya ubucucike mu mashuri ari nako hazamurwa ireme ry’uburezi.

Ni igikorwa cyabaye kuri uyu wa Gatandatu tariki ya 10 Kanama 2019, ku rwunge rw’amashuri rwa Gikore rwanabereyeho umuganda. Yijeje ababyeyi ko abanyeshuri bazahabwa ibikoresho nkenerwa harimo n’iby’ikoranabuhanga, bakiga neza nk’uko Leta ibishyize imbere.

Yagize ati “Aya amashuri turayubatse, ariko mu gihe gito tuzongera guhura twishimira kuyataha , tubona abana bayagiyemo. Aba bana ntabwo dushaka ko biga uko twe twize, bo barimo kwiga neza , bigishwa na Leta ibakunda”.

Min Munyakazi avuga ko Perezida wa Repubulika, Paul Kagame ahora ashaka icyateza imbere Uburezi kandi ko imvugo ye ariyo ngiro. Ati “Mu byo Nyakubahwa Perezida wa Repubulika yabemereye harimo guha abana bacu Uburezi bufite ireme, ubu rero yantumye ngo mbabwire ko ibyo yabemereye byose agiye kubibagezaho”.

Umuyobozi wungirije ushinzwe ubukungu mu Karere ka Gisagara, Hanganimana Jean Paul yashimiye cyane Leta y’Ubumwe kuri iki gikorwa cyo kubaka amashuri, agira ati ” Ibi byumba bizadufasha gushimangira ireme ry’uburezi mu karere kacu. Ibi byumba bitatu bizubakwa kuri iri shuri GS Gikoro , bizakemura ikibazo cy’abana bakoraga urugendo rwa kilometero 10 zose bajya kwiga ahandi”.

Akomeza avuga ko ibi byumba nibimara kuzura bizaba bihaye amahirwe yo kuzagira ishuri ry’uburezi bw’imyaka 12 (12YBE) kuri iki Kigo cya GS Gikoro.

Kuva tariki 10 Kanama 2019, ku rwego rw’Igihugu nibwo hatangijwe ku mugaragaro ibikorwa byo kubaka ibyumba by’amashuri bishya 1,150 n’ubwiherero 1,084 mu Turere twose uko ari 30, hagamije gukemura ikibazo cy’ingendo ndende n’ubucucike mu mashuri y’uburezi bw’ibanze bw’imyaka 9 n’imyaka 12.

Minisiteri y’uburezi itangaza ko guhera mu Ukwakira 2019, Guverinoma y’uRwanda ibitewemo inkunga na Banki y’Isi mu mushinga wayo w’iterambere rishingiye ku bumenyi, iteganya kubaka ibindi byumba by’amashuri 2,704 n’ubwiherero 3,648.

Izindi wakunda

Bwiza.com