bwiza.com
Amakuru Politiki

RDC: Ubwicanyi bukorwa n’inyeshyamba zikomoka muri Uganda bwahagurukije Perezida Tshisekedi

Perezida wa Repubulika Iharanira Demokarasi ya Congo, Félix Tshisekedi yatumije inama ku wa Gatanu tariki ya 9 Kanama 2019, y’abayobozi b’inzego zitandukanye  kugira ngo bigire hamwe ikibazo cy’umutekano w’abaturage ukomeza guhungabanywa n’inyeshyamba za ADF zikomoka muri Uganda.

Iyi nama yitabiriwe n’abofisiye muri Polisi n’ingabo, Minisitiri w’ingabo, Michel Bongongo, Minisitiri w’imari, Henri Yav Muland, umuyobozi mukuru w’urwego rushinzwe ubutasi muri Congo, umuyobozi mukuru w’ikigo cy’igihugu gishinzwe abinjira n’abasohoka n’abandi bayobozi batandukanye n’abajyanama.

Perezida Tshisekedi yatumije iyi nama nyuma yo kwandikirwa ibaruwa na Depite Nzangi Muhindo wamusabaga guhagarika ubwicanyi yise ‘jenoside’ bukorwa n’inyeshyamba za ADF, bugakorerwa abaturage cyane cyane bo mu gace ka Beni.

Nk’uko bitangazwa n’ikinyamakuru Actualitecd, mu gushakira hamwe igisubizo cy’ ubu bwicanyi, impuzamashyaka Lamuka yasabye umukuru w’igihugu kuba ingabo za Congo zahuza imbaraga n’iza Uganda zikagaba ibitero simusiga kuri izi nyeshyamba za ADF.

Iki kinyamakuru kandi gitangaza ko abantu 53 bamaze kwicwa na ADF mu byumweru bibiri, bakaza biyongera ku bihumbi by’abandi bagiye bicwa mu bihe bitandukanye muri aka gace ka Beni.

 

Izindi wakunda

Bwiza.com
error: Alert: Ntabwo byemewe!!