bwiza.com
Ahabanza » Rusizi: Abayisilamu basabwe guharanira gutera ikirenge mu cya Ibrahim
Amakuru Politiki

Rusizi: Abayisilamu basabwe guharanira gutera ikirenge mu cya Ibrahim

Umunsi mukuru w’igitambo( Eid- al-adha) mu bayisilamu b’akarere ka Rusizi waranzwe n’inyigisho zibakangurira  kugirana ibiganiro mu miryango bagamije kuyiteza imbere, kuyirinda amakimbirane n’ibindi byose byayambura umunezero Imana  iyigenera.

Basabwe gufatira urugero kuri Ibrahim washyiraga imbere ibiganiro mu muryango we, ari cyo cyatumye aho kwica umwana we Ismael ngo amutambeho igitambo, Imana yaramuhaye intama akaba ari yo atamba,iyo baba bataganira ngo bumvikane bikaba byarajyaga gutuma amwica akaba ari we atamba ho igitambo.

Izi nyigisho kimwe n’izindi zijyanye n’uwo munsi ukomeye cyane mu idini ya Isilamu bazihawe n’umuyobozi w’Abayisilamu mu karere ka Rusizi,Sheikh Nsengiyumva Miradji,wababwiye ko Imana ubwayo iha agaciro ibiganiro mu muryango bikagaragazwa n’uko umuryango ushyira imbere ibiganiro hagati y’abawugize iteka uhorana amahoro n’umunezero udashira,uwabibuze n’ayo mahoro n’umunezero by’abawugize bikawuburamo ukaruhira gusenyuka.

Yagize ati’’ Ibrahim yahaga umwana we n’umuryango wose ubwisanzure. Muri ibi bihe turabona mu miryango yacu umugabo afata icyemezo atagishije inama umugore we cyangwa abana  ariko Ibrahim yagishaga inama umuryango we. Niba Ibrahim yaragishaga inama umuhungu we kandi ari muto,kuki twe tudashaka kugishanya inama mu muryango? Kuki umugabo adashaka kugisha inama umugore ku byo agiye gukorera urugo? Kuki umugore we adashaka kubikora atyo? Kuki abana bakora ibyo batagishijemo inama ababyeyi cyangwa ngo n’ababyeyi bagishe inama abana?’’

Yakomeje ati’’ buri wese akwiye kugira ubwisanzure mu muryango,agatanga ibitekerezo kugira ngo ukomere,buri wese mu rugo rwe amenye ko agomba kugisha inama abagize umuryango,ufate icyemezo cy’ikintu runaka umaze kugisha inama umuryango wawe wose,nk’uko twabibonye kuri Ibrahim agisha inama umuhungu we Ismael kuko yamukundaga cyane,uyu muhungu na we amwubaha cyane.’’

Bibukijwe ko umuryango utagira akanya ko kuganira ariwo uhoramo intonganya

Ibi ariko bamwe mu bayisilamu bakuze bavuga ko bisigaye bigoye ugereranije na kera kuko nk’abana basa n’abateshutse mu muco w’idini n’igihugu wo kubaha ababyeyi.

Mbonyimana Ramadhan w’imyaka 70 y’amavuko ati’’ ni byo,umuryango utaganira ni wo uhoramo intonganya n’amakimbirane adashira,ari yo mpamvu usanga abana b’abahungu biyahuza ibiyobyabwenge,abakobwa bakajya mu ngeso mbi z’ubusambanyi zibakururira akaga gakomeye cyane, ariko ababyeyi dufite ikibazo gikomeye cyane cy’abana b’iki gihe badashaka kumva,hakaba uwo ubwira gukora icyo utagishoboye akaba yanagukubita kandi biri henshi. Twumva Leta ikwiye kudufasha abana bagasubira ku muco na ho ubundi ntibyoroshye.’’

Nzangande Sauda w’imyaka 77 we ati’’ kera iwacu muri Isilamu abagabo bagiraga umugore umwe bari bake cyane,abenshi wasangaga bafite 4 no kurenza, hakaba n’abagira abagore 2 mu nzu imwe n’abana kandi bakabana neza, bakubahana  bikagenda neza. Ariko ubu aragira umwe bikanga bikaba ibibazo,ugasanga ntibubahana cyangwa ngo abana babubahe,nkabona dukwiye gusubira ku nyigisho twigishwa,ubuyobozi bugashyira imbaraga mu mibanire myiza mu mirynago nk’izi nyigisho twabonye uyu munsi zigakomeza na Leta ikongera ingufu mu burere bw’abana,ni ho byagenda neza.’’

Mukashyaka Amina w’imyaka 16,avuga ko n’iwabo hari igihe bagira ibyo batumvikanaho,ariko babyikemurira ubwabo batarwanye cyangwa ngo bihe rubanda, agasanga kuba bagira igihe babaganiriza bibafasha kuzagira imbere heza, na we agasaba imiryango kwiyongeramo ubusabane,kuko iyo imiryango ibanye nabi abana ari bo ba mbere bahababarira.

Umunsi mukuru w’igitambo ubaye Abayisilamu bo mu karere ka Rusizi bishimira byinshi birimo imihanda ya kaburimbo izenguruka umusigiti wabo mu mujyi wa Rusizi bari barasabye kuva kera kuko iyari ihari itabashimishaga,kuba bifitiye amashuri 3 yisumbuye mu karere kose barimo no kubaka inzu igezweho y’ubucuruzi muri uyu mujyi, aho banashimira cyane perezida Kagame inkunga ikomeye yabateye ubwo bubakaga uwo musigiti barimo kuvugurura ubu ngo urusheho kujyana n’igihe.

Banishimira ko ibikorwa by’ubutagondwa n’iterabwoba rumwe mu rubyiruko rwabo rwari rutangiye kwinjiramo rwabiretse rukaba rumeze neza, n’abari babifungiwe hafi ya bose bafunguwe bakaba bari mu murongo mwiza,ubuyobozi bwabo bugashima ubufatanye na Leta mu kubirwanya bukanizeza ko bitazasubira na rimwe muri aka karere.

Basabwe kongera ibiganiro bagirana n’abagize umuryango

Izindi wakunda

Bwiza.com