bwiza.com
Imikino

Ibivugwa muri ruhago y’i Burayi; Messi yahamagaye Neymar kuri Telefoni

Abahagarariye mu mategeko rutahizamu Neymar w’imyaka 27 y’amavuko wa Paris Saint-Germain n’uwa Brezili, bafotowe binjira mu biro by’ikipe yahoze akinamo ya Barcelone. (Gol TV, via AS).

Real Madrid iracyashaka kugura Neymar ndetse izareka gukomeza gushakisha Paul Pogba w’imyaka 26 y’amavuko, umukinnyi wo hagati wa Manchester United n’uw’ikipe y’igihugu y’Ubufaransa. (Sun)

Paris Saint-Germain isa nk’iyaretse kugurisha umwenda w’umukinnyi Neymar mu iduka ry’iyi kipe. (UOL Esporte, via Marca)

Messi, rutahizamu wa Barcelone n’uwa Argentine w’imyaka 32 y’amavuko, yahamagaye Neymar kuri telefone mu kugerageza kumusaba kujya muri Barcelone aho kujya mu ikipe mucyeba ya Real Madrid.(Marca)

Manchester United yatangajwe no kumva Pogba aca amarenga yuko ashobora nubundi kuva muri iyi kipe kuri iyi mpeshyi. (Mirror).

Ikipe ya Juventus ifite igikombe cya shampiyona y’Ubutaliyani irashaka kugura Christian Eriksen, umukinnyi ukomoka muri Denmark w’imyaka 27 y’amavuko, mu gihe kontaro ye muri Tottenham izaba irangiye mu mpera y’uyu mwaka w’imikino. (Metro).

Tottenham ifite ubushake bwo gukuba inshuro zirenze ebyiri umushahara wa Eriksen ukagera hafi ku 200,000 by’amapawundi ku cyumweru, ariko iracyafite impungenge ko ibyo bishobora kuba bidahagije ngo ayigumemo. (Mail).

Bayern Munich iri mu biganiro na Barcelone byo kugura Umunya-Brezili Philippe Coutinho w’imyaka 27 y’amavuko ukina hagati mu kibuga, ikamugura nk’inguzanyo mu gihe cy’umwaka harimo n’ibiteganywa n’ingingo y’igihe yaba avuye muri iyi kipe. (RAC1, via AS)

Daniel Sturridge w’imyaka 29 y’amavuko wahoze ari rutahizamu wa Liverpool, yavuze ko muri iki cyumweru azafata icyemezo kuri ejo hazaza he, mu gihe agitekereza ku makipe 13 amwifuza, harimo n’ikipe ya Fenerbahce yo muri Turukiya ishaka kujya imuhemba amapawundi 60,000 ku cyumweru. (Telegraph)

Rutahizamu Wilfried Zaha w’imyaka 26 y’amavuko ukomoka muri Côte d’Ivoire yemeye gushyira ku ruhande ibyo atumvikanaho n’ubuyobozi bw’ikipe ya Crystal Palace, nyuma yaho mugenzi we Mamadou Sakho amusabiye kwitanga we wese ubwo bari mu nama y’abakinnyi. (Sun).

Ivan Perisic, umukinnyi wo ku ruhande wa Inter Milan n’uw’ikipe y’igihugu ya Croatia w’imyaka 30 y’amavuko, yakorewe ibizamini byo kwa muganga mu ikipe ya Bayern Munich, ndetse byitezwe ko iyi kipe imugura kuri miliyoni 5 z’ama-euro ku nguzanyo mu gihe cy’umwaka, ikaba yanashobora kumugura burundu umwaka utaha kuri miliyoni 20 z’ama-euro. (Bild)

Rutahizamu Gareth Bale w’imyaka 30 y’amavuko w’ikipe y’igihugu ya Wales (pays de Galles) yiteguye kuguma ku ntebe y’abasimbura muri Real Madrid kugeza ubwo shampiyona yo mu Bushinwa izatangirira mu kwezi kwa cumi na kumwe cyangwa ubwo Zinedine Zidane yaba yirukanwe. (Mail)

Ikipe Inter Miami – David Beckham akaba ari umwe muri ba nyirayo – izagura Edinson Cavani, rutahizamu w’imyaka 32 y’amavuko ukomoka muri Uruguay, ubwo kontaro ye muri Paris Saint-Germain izaba irangiye mu kwezi kwa gatandatu kwa 2020. (Fox Deportes).

Liverpool izemera igiciro cya miliyoni 15 z’ama-euro hiyongereyeho uduhimbazamusyi kuri Dejan Lovren, umukinnyi myugariro wayo w’imyaka 30 y’amavuko ukomoka muri Croatia, mu gihe AC Milan na Roma zirikumushaka. (Liverpool Echo)

Myugariro Matteo Darmian w’imyaka 29 y’amavuko wa Manchester United n’Ubutaliyani, byitezwe ko yerekeza muri Inter Milan ubwo kontaro ye izaba irangiye mu mpera y’uyu mwaka w’imikino. (Rai Sport, via Star)

Rutahizamu Raheem Sterling w’imyaka 24 y’amavuko wa Manchester City n’uw’ikipe y’igihugu y’Ubwongereza, ari gutekereza ku masezerano ya miliyoni 100 z’amapawundi ajyanye no kwamamaza urukweto rwa kompanyi Nike. (Telegraph).

Wissam Ben Yedder, rutahizamu wa Sevilla n’uw’Ubufaransa w’imyaka 29 y’amavuko, byitezwe ko yerekeza muri Monaco ku giciro cya miliyoni 40 z’ama-euro. (L’Équipe)

Nicolas Pépé, umukinnyi wo ku ruhande wa Arsenal n’uwa Côte d’Ivoire w’imyaka 24 y’amavuko, yagiye muri Arsenal avuye muri Lille kuko yashakaga kuba mu ikipe ashobora gutangamo umusaruro ufatika, nkuko bivugwa na Perezida w’iyi kipe ya Lille yo mu Bufaransa. (Sky Sports).

Liverpool ntabwo ishobora gukura umunyezamu Loris Karius w’imyaka 26 y’amavuko yatije mu ikipe ya Besiktas muri Turukiya, nyuma yaho umunyezamu wayo Alisson – Umunya-Brezili w’imyaka 26 y’amavuko – avunikiye ku mpfundiko, kandi ni ho hahandi n’uyu Mudage Karius na we ntarigukina kuri ubu kubera imvune nk’iyo yo ku mpfundiko. (Liverpool Echo).

Izindi wakunda

Bwiza.com
error: Alert: Ntabwo byemewe!!