bwiza.com
Amakuru Politiki

Mu Karere ka Nyaruguru harikangwa inzara ishobora kukibasira

Umuyobozi w’Akarere ka Nyaruguru ushinzwe ishami ry’ubuhinzi n’umutungo kamere, Bwana MUHAYIMANA Nelson yasezeranyije abahinzi bo muri aka Karere kubaha ishwagara, ifumbire ndetse n’imbuto z’indobanure kugira ngo ahumurize abakeka ko aka Karere gashobora guhura n’icyorezo cy’inzara nyuma y’aho igihembwe cy’ihinga gishize cyabahombeye.

Ibi yabivuze nyuma y’uko aba baturage biganjemo abakora umwuga w’ubuhinzi bavuze ko hatagize igikorwa ngo haboneke imbuto y’indobanure cyane cyane y’ibirayi icyorezo cy’inzara gishobora kwararika abaturage batuye muri aka Karere.

Aba baturage bavuze ko mu gihembwe cy’ihinga gishize bahuye n’igihombo gikomeye, nyuma y’aho imyaka yabo yiganjemo ibirayi irumbye. Abahinzi baganiriye n’umunyamakuru wa Radiotv10 bavuze ko ubuzima bwabo buri mu kaga nyuma y’aho bitezaga imbere binyuze mu gihingwa cy’ibirayi ariko bikaba byararumbye.

Hitimana Gaspard yagize ati:” Abana banjye ntibarajya ku ishuri kuko nabuze amafaranga y’ishuri, yemwe n’ay’urugendo nayakuraga mu birayi none byararumbye, ahavaga umusaruro w’ibiro 300 by’ibirayi havuye 100.”

Mu gihe abahinzi bari mu gihembwe cya 3 cy’ihinga gikunze gukorerwa mu bishanga, mu Karere ka Nyaruguru ahahinze ibirayi hari ku buso bungana na hegitare zisaga 400 nk’uko iyi nkuru dukesha RadioTV10 ikomeza ivuga.

Minisiteri y’Ubuhinzi n’Ubworozi, MINAGRI, ivuga ko umusaruro ugera kuri 25% uva mu Karere k’Ububeruka: Burera na Gicumbi, na ho umusaruro ungana na 10% uva muri Nyamagabe, Nyaruguru, Rutsiro na Karongi (Crête Congo-Nil), hanyuma umusaruro ungana na 5% ugaturuka mu tundi duce tw’igihugu.

Buri gihembwe cy’ihinga; ubuso buhingwaho ibirayi mu Rwanda buri hagati ya hegitari ibihumbi 50 n’ibihumbi 60. Kuri hegitari haterwaho imbuto z’ibirayi ziri hagati ya toni 1 na toni 1,5.

Izindi wakunda

Bwiza.com