bwiza.com
Ahabanza » Syria: Indege y’igisirikare cy’igihugu yarashwe, umupilote arafatwa
Amakuru Umutekano

Syria: Indege y’igisirikare cy’igihugu yarashwe, umupilote arafatwa

Tahrir al-Sham, umutwe w’iterabwoba ushamikiye kuri Al Qaeda watangaje ko warashe indege ya gisirikare ya Syria, Sukhoi 22, umupilote wayo wagerageje guhunga arafatwa.

Iyi ndege yakorewe mu Burusiya yavaga mu birindiro by’ingabo z’igihugu mu ntara ya Homs, irasirwa muri Khan Sheikhoun ubwo yari hafi y’intara ya Idlib yiganjemo imitwe irwanya ubutegetsi, cyane nk’umutwe wa Tashrir al Sham.

Khan Sheikhoun ni wo mugi wagabwemo igitero cy’imyuka y’uburozi mu 2017, cyatwaye ubuzima bw’abagera ku 100.

Leta ya Syria iyobowe na Bashar al Assad yo yahakanye kuba inyuma y’iki gitero yashinzwe na Leta Zunze Ubumwe z’Amerika ndetse n’Umuryango w’Abibumbye.

Umugi wa Khan Sheikhoun uri mu maboko y’imitwe y’iterabwoba kuva mu 2014.

Uyu mutwe w’iterabwoba ntabwo usobanura uburyo wahanuyemo iyi ndege. Leta ya Syria yo nta kintu irabivugaho nk’uko The Jerusalem Post yabitangaje.

Kuva mu 2011, imitwe y’iterabwoba yatangiye kugaba ibitera mu duce dutandukanye twa Syria, itangira no kwangiza bimwe mu bikorwaremezo by’igisirikare cy’igihugu mu rwego rwo kudashyigikira Bashar nk’Umukuru w’Igihugu. Yagiye ifata kandi imigi itandukanye nka Khan Sheikhoun, Morek, Kafr Zeita na Latamneh.

Raporo y’Umuryango uharanira uburenganzira bwa muntu (Human Right Watch) yo mu 2018 yagaragaje ko abantu basaga 400,000 ari bo bari bamaze kugwa mu makimbirane ya Bashar n’abamurwanya, abasaga miliyoni 5 bahungiye hanze y’igihugu, miliyoni 6 bimurwa mu byabo.

Bayifotorejeho bakimara kuyihanura
Ni uku Sukhoi 22 iteye

Izindi wakunda

Bwiza.com