bwiza.com
Amakuru Politiki

U Burundi buteye ikirenge mu cy’u Rwanda, Tanzania na Kenya

Minisiteri ishinzwe kurengera ibidukikije yatangaje ko kuva tariki 22 z’uku kwezi bibujijwe kwinjiza no gukoresha amashashi atabora mu Burundi ndetse uzabirengaho azahanwa. U Burundi bukaba buteye ikirenge mu cy’ibihugu byo mu Karere, nk’u Rwanda, Tanzania na Kenya.

Mu kiganiro n’abanyamakuru ku wa kabiri, tariki ya 13 Kanama 2019, Minisitiri Dr Déo-Guide Rurema yavuze ko amashashi atabora mu Burundi akiri gukoreshwa cyane nyamara itegeko riyabuza.

Abaturage mu Burundi bavuga ko ubundi buryo bwo gutwaramo butangiza ibidukikije buvugwa budahagije mu gihugu.

Mu mwaka ushize, leta y’u Burundi yasohoye itegeko ribuza ikoreshwa ry’amashashi atabora mu gihugu, itanga amezi 18 yo gushyira mu bikorwa iri tegeko no kugabanya ayo mashashi.

Minisiteri yo kurengera ibidukikije ivuga ko nubwo hasigaye amezi atandatu ngo icyo gihe cyatanzwe kirangire amashashi atabora agikoreshwa cyane kandi ari menshi ku isoko.

Minisitiri Rurema yavuze ko kuva kuwa kane w’icyumweru gitaha “umuntu wese uzafatanwa ishashi itabora azahanwa”. Kandi ko kuyinjiza mu gihugu no kuyakoresha mu bucuruzi bibujijwe.

Yagize ati: “Turasaba ibiro bishinzwe imisoro mu Burundi na polisi kudufasha kugira ngo iyi myanzuro ishyirwe mu bikorwa uku ivuzwe”.

Minisiteri y’ibidukikije mu kiganiro n’abanyamakuru yerekanye ubundi buryo bwo gutwaramo ibyo bafite butangiza ibidukikije, yemeza ko Abarundi ubu bafite andi mahitamo.

Bamwe mu baturage bagaragaza ko ubundi buryo bwo gutwaramo ibyo bafite butangiza ibidukikije bukiri bucye cyane mu gihugu ariyo mpamvu bakomeje gukoresha amashahi.

Umwe mu banyamakuru mu mujyi wa Bujumbura yabwiye BBC uyu munsi ko amashashi akiri menshi cyane muri uyu mujyi kandi aribwo buryo buhari kuko atangiza ibidukikije adahagije.

Muri aka karere, u Rwanda (mu mwaka wa 2008) na Kenya (mu mwaka wa 2017) nabyo byaciye ikoreshwa ry’amashashi atabora uretse mu bikorwa by’ubuvuzi n’imiti.

BBC itangaza ko mu kwezi kwa gatandatu Tanzaniya yamenyesheje abinjira muri iki gihugu ko amashashi yose abujijwe kwinjizwa, gusohorwa, gukorerwa, gucuruzwa no kubikwa muri Tanzania.

Igihugu cya mbere cyaciye ikoreshwa ry’amashashi atabora ku isi ni Bangladesh, mu mwaka wa 2002.

Kugeza ubu, ibihugu 63 ku isi byashyizeho amabwiriza n’amategeko yo guca amashashi mu buryo bunyuranye nkuko bitangazwa n’ishami ry’umuryango w’abibumbye ryita ku bidukikije, UNEP.

Izindi wakunda

Bwiza.com
error: Alert: Ntabwo byemewe!!