bwiza.com
Amakuru

Joe Mwangi yahishuye amafaranga Wendy Waeni yahembwe na Perezida Kagame

Joe Mwangi, wahoze akurikirana inyungu (Manager) z’umwana w’umukobwa, Wendy Waeni, wo muri Kenya wamamaye mu mukino ngororamubiri wa Acrobatie, akaba yarigeze kuza mu Rwanda, kuri uyu wa Kabiri ushize yatangaje umubare w’amafaranga yahembwe icyo gihe na Perezida Kagame.

Ibi yabishyize hanze nyuma y’aho Wendy Waeni amushinjije kumunyunyuza imitsi agasiga umuryango we mu bukene nyamara yarazengurutse amahanga ataramira abakuru b’ibihugu batandukanye hirya no hino ku isi.

Mu baperezida Wendy yataramiye  harimo uw’u Rwanda, Paul Kagame. Abinyujije kuri twitter kuri uyu wa kabiri ushize, Joe Mwangi, wahoze akurikirana inyungu z’uyu mwana w’umukobwa w’imyaka 13, yahishuye ko uyu mwana yahembwe na Perezida Kagame amadolari 5,000 (Amashilingi ya Kenya 500,000/ Miliyoni zisaga 4 z’Amanyarwanda), we agahembwamo 20% (Amashilingi 100,000) nka manager.

Yavuze ko nyina w’umwana  ari we wakiriye amafaranga ayahawe na Perezida akamusaba kugenda agashaka business akoramo.

Ati: “Uko yakoresheje ibyo bihumbi 400 ntabwo bindeba, si byo ?

Nk’uko Mwangi yakomeje abivuga, ngo umuryango wa Waeni wabonaga amafaranga yabaga yakoreye bitandukanye n’ibyo uyu muryango uvuga.

Mwangi yibukije kandi ko nyina w’uyu mwana aherutse kubazwa kuri Radio Jambo niba umwana yarabonaga ibyo akwiye agasubiza ko yabibonaga.

Mwangi akaba abaza icyahindutse kugirango bareke kuvuga ko nta n’igiceri babonye (umuryango wa Waeni) mu gihe cy’imyaka itanu, noneho nyina akagira ati: “Nimekua nikipata kidogo kama elfu ishirini”.ugenekereje mu Kinyarwanda ni nko kuvuga ngo “nabonaga dukeya nk’ibihumbi makumyabiri,

Wendy Waeni ubwo yakirwaga na Perezida Kagame

Ibi kandi byaje nyuma y’amasaha makeya Joe Mwangi ashinjije nyina gukoresha amashilingi 100,000, yagombaga kwishyurira ishuri Wendy, mu kunywa inzoga nk’uko iyi nkuru dukesha urubuga Hivisasa ikomeza ivuga.

Uyu mubyeyi ariko avugana na Citizen yahakanye ibivugwa na Mwangi ndetse atangaza ko ataranasogongera ku nzoga kubera ko ngo ari umukirisitu kandi wubaha.

Yagize ati: “Ndi Umukirisitu uhamye, sinigeze nywa inzoga mu buzima bwanjye, umukobwa wanjye yabihamya. Joe Mwangi ni umubeshyi ni yo mpamvu byari bikwiye ko adakomeza kureberera umukobwa wanjye.”

 

 

Izindi wakunda

Bwiza.com