bwiza.com
Amakuru Politiki

Ndikuriyo Reverien aranugwanugwa nk’ushobora gusimbura Perezida Nkurunziza

Nyuma y’aho Perezida Pierre Nkurunziza w’u Burundi atangarije ko mu matora yo mu 2020 ataziyamamaza ku mwanya w’umukuru w’igihugu, benshi bakomeje kwibaza uwo ishyaka CNDD-FDD rizatanga nk’umukandida, bityo uwitwa Ndikuriyo Reverien akaba ashyirwa mu majwi.

Kuva mu mwaka wa 2016, ubwo Perezida Nkurunziza yari amaze gutsinda amatota yo mu 2015 ya manda ye ya gatatu, uyu Reverien ngo yatangiye kuzenguruka u Burundi, mu rwego rwo kwiyegereza abaturage anabimenyekanishaho.

Ikinyamakuru UBM News gitangaza ko nyuma y’uyu mugabo usanzwe ari n’umwe mu bakomeye mu ishyaka CNDD-FDD, hari abandi bayobozi banugwanugwa barimo Gen Bunyoni, Denise Nkurunziza akaba n’umufasha wa Perezida Nkurunziza, Ndayishimiye Evariste usanzwe ari Umunyamabanga mukuru wa CNDD-FDD,…

Iki kinyamakuru gitangaza ko Ndikuriyo azwiho kuba mu bayobozi bari bahanganye n’abigaragambyaga mu 2015 bamagana manda ya gatatu ya Nkurunziza, ndetse ko yumvikanye asaba inzego z’umutekano guhashya uwo ariwe wese ushaka guhangana n’ubutegetsi.

Uyu mugabo kandi wahimbwe izina rya Kora, ngo yarivuze ubwo yashishikarizaga inzego z’umutekano gukora cyane, ngo zihashye abarwanya Leta bari bakajije umurego.

Ikindi benshi bamuziho ngo ni uko ari umwe mu barwanye urugamba bise urukomeye rwafashije CNDD-FDD gufata ubutegetsi ndetse ngo akaba ari umwe mu bantu ba hafi ba Perezida Nkurunziza.

Izindi wakunda

Bwiza.com
error: Alert: Ntabwo byemewe!!