bwiza.com
Amakuru mu Rwanda

Nyamasheke: Ikamyo yari itwaye Lisansi yafashwe n’inkongi y’umuriro irakongoka- AMAFOTO

Mu mudugudu wa Kagarama, akagari ka Kibogora, mu Murenge wa Kanjongo mu Karere ka Nyamasheke haravugwa  impanuka y’ikamyo yari itwaye Lisansi (African oil) yafashwe n’inkongi y’umuriro irakongoka.

Yari itwaye Lisansi ya sosiyete yo mu gihugu cy’u Burundi ariko ngo yari yarakodeshejwe n’umunyekongo witwa David Biluka Eric, yari ivuye i Kigali ijyanye iyo Lisansi i Bukavu muri Kongo igeze  kuri Sitasiyo ya Lisansi ya Kanjongo igwa mu muhanda rwagati hafi y’iyo sitasiyo ya Lisansi ihita ishya irakongoka yose.

Amakuru Bwiza.com yahawe na bamwe mu baturiye aho iyo mpanuka yabereye, bavuze ko yabaye ahagana saa kumi n’imwe na 45 z’igitondo, aho bakanguwe n’urusaku rukomeye rw’amapine yari aturitse n’ibindi bice bimwe na bimwe byayo byaturagurikaga cyane.

Bamwe bagize ngo ni amasasu avuze batangira gusohokana ibintu nk’abahunga, barebye mu muhanda babona icyotsi cyinshi n’ibintu biri gushya bagira ngo ni iyo sitasiyo ya Lisansi ifashwe n’inkongi y’umuriro batangira kugana aho ku muhanda bajya kureba ibibaye no kuzimya.

Bavuga ko bahageze bagasanga ari ikamyo yagwiriye urubavu Lisansi irameneka irayikongeza, ikamyo itangira kugurumana cyane ku buryo ngo byari bigoye kuhagera ariko uko umuriro wagendaga ugabanya ubukana bagiye bahegera nubwo ntacyo bashoboye gukora.

Hategekimana Aaron uhaturiye yagize ati’’ twakanguwe n’urusaku rwinshi cyane tugirango ni amasasu menshi avuze kuko byaturagurikaga cyane bamwe batangira gusohokana ibintu nk’abahunga ariko tubonye icyotsi cyinshi cyane kuri sitasiyo ya Lisansi twibwira ko ari yo ihiye bamwe batangira kujyayo ariko batahegera kubera ko umuriro n’umwotsi byari byinshi cyane, buhorobuhoro uko ugenda ugabanuka tubona ari ikamyo yaguye mu muhanda rwagati ikahahira.’’

Yakomeje ati’’ abayobozi batandukanye n’inzego z’umutekano bahise bahagera dutangira kureba uko twatangira umuriro ntutwike iriya sitasiyo ya Lisansi kuko imodoka yo nta kindi twari kuyikorera, tugira amahirwe ntiwahagera kuko yahiye amasaha arenga 3 yose twabuze ikindi twayikorera icyakora umushoferi n’undi bari kumwe bo bari bavuyemo ari bazima, ubuyobozi bw’akarere buraduhumuriza,ubu dutangiye gusubira ku mirimo yacu.’’

Umuyobozi w’aka karere Kamari Aimé Fabien, yabwiye Bwiza.com ko iyi kamyo yari itwawe n’uwitwa Kamanzi Faustin ari kumwe na kigingi we.

Kigingi avuga ko atazi niba shoferi yabashije kuyivamo ariko umuyobozi w’akarere akavuga ko basanzemo umuntu wahiriyemo agakongoka bigakekwa ko yaba ariwe.

Meya Kamari akomeza avuga ko iyi mpanuka  ishobora kuba yatewe n’umunaniro ukabije w’umushoferi ngo wari wahagurutse i Kigali saa kumi n’ebyiri z’umugoroba, akaba yari yasinziriye, kuko ikamyo yaguye mu ikorosi rihari.

Ku byerekeranye no kuba agace k’umuhanda wa kaburimbo Tyazo –Kabuga iyi kamyo yahiriyemo  kari kafunzwe, uyu muyobozi yavuze ko bagafunze iyi kamyo ikigurumana cyane, imodoka zikajya zica mu muhanda w’igitaka  Kabuga-Kibogora-Tyazo uhari kugira ngo bongere kugera ku muhanda munini wa kaburimbo, gusa ngo umuriro umaze gucisha make umuhanda wongeye  gufungurwa ubu ni nyabagendwa.

Izindi wakunda

1 Igitekerezo

Ituze Gilbert 16/08/2019 6:01 pm at 6:01 pm

Imana Imwakire mu bayo.

Subiza

Tanga Igitekerezo

Bwiza.com