bwiza.com
Ahabanza » Rwamagana: Polisi  yafatiye mu cyuho umukobwa  waranguzaga urumogi
Amakuru mu Rwanda

Rwamagana: Polisi  yafatiye mu cyuho umukobwa  waranguzaga urumogi

Ahagana saa Tatu z’igitondo cyo ku wa kane tariki ya 15 Nyakanga 2019, mu Mudugudu wa Kabuye, Akagari ka Cyanya, mu Murenge wa Kigabiro, Akarere ka Rwamagana, polisi y’igihugu ikorera muri aka karere yafatiye mu cyuho umukobwa ufite imyaka  21 witwa Uwase Fatuma  arimo kuranguza urumogi.

Nyuma yo gutungurwa n’abapolisi arimo kubara urumogi yari agiye kuranguza umusore wahise yiruka, umukobwa nyiri urumogi yahise asohokera mu gikari apfumura urugo ajya gutaba urumogi mu murima uri hepfo y’urugo rwabo ariko abapolisi bari bagose urugo abandi barimo kuzenguruka mu nkengero z’urugo.  Abo nibo babonye aho arengeye baramukurikirana bamufatana udupfunyika 2400.   .

Uyu mukobwa bamaze kumufata, yajyanwe mu modoka yambaye amapingu kuri sitasiyo ya polisi iri mu Murenge wa Kigabiro, ashyikirizwa urwego rw’ubugenzacyaha.

Uyu muturage utashatse ko amazina ye atangazwa, avuga ko muri urwo rugo bamaze igihe bacuruza urumogi ku manywa y’ihangu.

Yagize ati “Mu kanya nari nicaye mu rugo abana barambwira ngo hari abapolisi baje gusaka kwa Wakenya, nahise nza kureba mpageze nsanga hari abapolisi bagose urugo, tugiye kubona tubona umukobwa wo kwa Wakenya aramanutse mu nsi y’urugo yiruka cyane, mu kanya gato tubona abapolisi baramuzanye bamufite, afite igishashi kirimo urumogi, tukaba twishimiye igikorwa polisi yakoze kuko urebye uburyo aba baturanyi bagurisha urumogi ku mugaragaro twibazaga icyaburaga ngo bafatwe kandi amakuru twarayatangaga kenshi mu buyobozi”.

Undi muturage na we ati “Twahoraga dutewe impungenge n’urumogi rucururizwa hano kuko byari bitubangamiye cyane”.

Umuvugizi wa Polisi y’u Rwanda  mu Ntara y’Iburasirazuba, CIP  Twizeyimana Hamuduni  yemeza ko uwo mukobwa bamutanye udupfunyika 2400 tw’urumogi akanasaba  abaturage gutanga  amakuru ahacururizwa ibiyobyabwenge.

Yagize ati “Twamenye amakuru ko baranguza ibiyobyabwenge by’urumogi twagiye tumufatana udupfunika 2400 tw’urumogi tumushyikiriza ubugenzacyaha, tukaba dushimira abaturage baduhaye amakuru ariko kandi turasaba abaturage gukomeza kuduha amakuru kugira ngo abarucuza nabo bafatwe”.

Ingingo ya 263 mu gitabo cy’amategeko ahana ibyaha mu Rwanda ivuga ko umuntu wese ukora, uhinga, uhindura, utunda, ubika, uha undi, ugurisha mu gihugu ibiyobyabwenge cyangwa urusobe rw’imiti ikoreshwa nkabyo mu buryo bunyuranije n’amategeko,

Aramutse ahamijwe icyo cyaha  yahanishwa igifungo kuva ku myaka irindwi kugeza ku gifungo  cya burundu n’ihazabu y’amafaranga y’u Rwanda arenze miliyoni makumyabiri (20.000.000 FRW) ariko atarenze miliyoni mirongo itatu 30.000.000 FRW.

 

Ngabonziza Justin/Bwiza.com

Izindi wakunda

Bwiza.com