bwiza.com
Amakuru Ubuzima

Tanzania: Umubare w’abaguye mu mpanuka i Morogoro ugeze kuri 93

Kuri uyu wa 16 Kanama, abandi bantu bane bakomerekeye mu mpanuka y’iturika ry’ikamyo itwara esansi bapfuye mu ntara ya Morogoro, umubare w’abamaze kuyigwamo ugera kuri 93.

Ku wa 10 Kanama ni bwo abantu biganjemo abatwara moto bahutse imodoka itwara esansi yaguye hasi, batangira kuyivoma. Umwe muri bo wanywaga itabi ni we wabaye intandaro yo kwaka kw’iyi kamyo yaje kubaturikana.

Umubare w’abaguye muri iyi mpanuka wabanje kuvugwa wari 57, wiyongera ugera kuri 60. Ku munsi ukurikiyeho, ibinyamakuru nka The Global Publishers byatangaje ko abasaga 64 ari bo bamaze gutangazwa ko bamaze gupfa. Abakomerekeyemo basagaga 70. Hangirikiyemo kandi na moto nyinshi z’aba batwazi bavomaga esansi.

Ikinyamakuru, Mwananchi gikorera muri iki gihugu cyatangaje ko umubare umaze kugera kuri 93, uvuye kuri 89.

Umunsi wakurikiye uwabereyeho impanuka, Perezida Magufuli yashyizeho iminsi itatu y’icyunamo yarangiye ku wa 13 Kanama. Iyi minsi ni yo yashyinguwemo ababuriye ubuzima muri iyi mpanuka.

Abakomerekeye muri iyi mpanuka baracyitabwaho mu bitaro bya Muhumbili biri mu murwa mukuru, Dar es Salaam.

Minisitiri w’Intebe Kassim Majaliwa mu muhango wo gushyingura abaguye mu mpanuka
Ikinyamakuru The Citizen cyatangaje ku wa 13 Kanama ko 75 ari bo bamaze gupfa

Izindi wakunda

Bwiza.com