bwiza.com
Amakuru Imikino

Rayon Sports yasubijwe ku mpungenge z’umutekano muke muri Sudani

Ubuyobozi bw’impuzamashyirahamwe y’umupira w’amaguru muri Afurika, CAF, bwandikiye Rayon Sports ku bw’impungenge z’umutekano muke yagize muri Sudan mu gihe yazaba ikina na Al Hilal.

Aya makipe ari mu irushanwa ry’amakipe y’Afurika yabaye aya mbere muri shampiyona z’iwabo (CAF Champions League), yanganyirije igitego 1-1 i Kigali.

Bitewe n’ibibazo by’umutekano muke umaze igihe muri Sudani, Ubuyobozi bwa Rayon Sports bubicishije mu ishyirahamwe ry’umupira w’amaguru mu Rwanda (FERWAFA) bwandikiye CAF buyisaba  ko umukino wo kwishyura wazabera mu kindi gihugu.

Mu ibaruwa ya CAF yanditswe n’umunyamabanga wungirije, Anthony Baffoe, kuri uyu wa 16 Kanama yavuze ko impuzamashyirahamwe izita cyane ku mutekano w’amakipe yombi n’umukino muri rusange.

CAF yanaboneyeho gusaba ishyirahamwe ry’umupira w’amaguru muri Sudani kwita ku mutekano w’amakipe yombi, ivuga ko ibisabwa byose ngo umukino uzagende neza bihari.

Yavuze ko umukino ugomba kubera muri Sudani, yizeza Rayon Sports ko ikomeje gukurikirana ibibazo by’umutekano muri Sudani.

Umukino wo kwishyura uzabera mu murwa mukuru wa Sudani, Khartoum ku wa 25 Kanama 2019.

Ibaruwa yanditswe mu rurimi rw’Igifaransa

Izindi wakunda

Bwiza.com