bwiza.com
Amakuru Iterambere ry'umuryango

Rusizi/Nkombo: Abagabo  ntibazi ko hari uruhare bashobora kugira mu konka kw’abana babo

Abagore benshi bo mu murenge wa Nkombo mu karere ka Rusizi bavuga ko abagabo babo igihe kinini bakimara mu burobyi ntibabafashe mu bindi bireba imikurire y’abana cyane cyane mu konsa kuko ngo batumva icyo umugabo yamara mu konka k’umwana, bamwe mu bagore bagasaba abagabo babo ko nibura bajya babibibutsa igihe babyibagiwe,kuko abana benshi ngo batonka neza kubera ko hari ababyeyi bahugira mu gushakisha igitunga bakuru babo abonka bakahazaharira.

Ni bimwe mu byagaragajwe n’aba bagore,bamwe mu bagabo bakavuga ko badashobora kwirirwa iruhande rw’abagore babo ngo barabakangurira konsa , ubwo muri uyu murenge hizihirizwaga umunsi mpuzamahanga wo konsa  n’icyumweru cyahariwe konsa, ahateraniye abayobozi banyuranye mu rwego rwo gukangurira ababyeyi imikurire myiza y’abana,cyane cyane kubonsa neza,kuko abenshi mu bana baho usanga igikuriro cyabo ntaho gihuriye n’imyaka yabo, ngo bigaterwa no kutonka bihagije kandi neza.

Umuyobozi ushinzwe imirire muri UNICEF Youssouf Koita, yabasobanuriye akamaro gakomeye ko konsa umwana kuva akivuka ahabwa amashereka ya mbere y’umuhondo n’akamaro kayo mu mikurire ye, kandi ko konsa nta kiguzi gihambaye kindi bisaba ariko ari ingenzi cyane ku mwana no ku mubyeyi kuko umwana wonse neza ngo bimugiraho ingaruka nziza ubuzima bwe bwose.

Yavuze ko umubyeyi wese wifuza kugira uruhare mu iterambere ry’igihugu agomba guhera ku konsa umwana neza kuko aba ari we igihugu cy’ejo gitezeho umukiro, kutamwonsa neza no kutamuha ibindi byangombwa akenera mu buzima bikaba ari no kudindiza iterambere ry’igihugu ry’ejo hazaza,kandi ko bitareba ababyeyi b’abagore gusa,bireba n’abagabo  n’ubuyobozi bw’inzego zose muri rusange,zikaba zigomba guhora zibibakangurira kuko ari yo mibereho myiza y’ingenzi y’umwana.

Abayobozi batandukanye basabye ababyeyi kumva ko uruhare rwa bose ari ingenzi ku mwana

Bamwe mu babyeyi baganiriye na Bwiza.com ntibabivuzeho rumwe,cyane cyane kwitana bamwana kw’abagore n’abagabo kuri iki kibazo.

Nyandwi Francine  yagize ati’’ mfite abana 7, uyu  afite amezi 6 nkurikije ufite imyaka 2. Se iyo atagiye gushakishiriza mu mazi ikidutunga hari igihe aba ari mu rugo ubona afite ibibazo by’icyo turi burye. None baratubwiye ngo abagabo bagomba kugera n’aho baturirimbira kugira ngo amashereka aze. Ubu koko natinyuka kubwira umugabo mbona na we wifitiye ibibazo ngo nandirimbire mbone amashereka? Sinabona aho mbihera mbimubwira rwose.’’

Yarakomeje ati’’ abana bacu bakura nabi kuko ntacyo abenshi tugira cyo kubaha  kuko ubutaka bwacu ntibwera ngo tubone ibidutunga bihagije, ikivu ducungiraho nacyo ibikivamo biragenda bigabanuka ntibikijyanye n’ubwiyongere bwacu, nk’ubu ikivu gifunze inzara ishobora no kubatwicana natwe abayeyi  itaturetse kuko kubona ikindi umuntu yakora bigoye, bisaba kwambuka amazi buri munsi utaye uwo mwana wonka ukongera kumureba nijoro wananiwe utari bunamwonse neza,ubwo se urumva bagira imibereho myiza gute koko?’’

 Umwe mu bagabo we  ati’’ jye sinumva uruhare nagira mu konsa umwana kuko nyina ni we ufite amabere yo kumuha. Nakora iki se ko n’ibyo barya mba nabibuze ari yo mpamvu bamwe ubona baba baragwingiye? Umugore se wamuririmbira atariye ayo mashereka akaza? Nibadushakire ibyo twakuraho ifaranga duhahire abana na ho ino imibereho iragoye rwose.’’

Umuyobozi ushinzwe imirire n’isukura muri porogaramu y’igihugu mbonezamikurire Alexis Mucumbitsi, yabasabye gufatanya kwita ku mwana kuva agisamwa kugera akuze,agashakirwa ibikwiriye byose kugira ngo azabashe kwigirira akamaro akagirire n’igihugu, anabibutsa ko igihe ababyeyi bombi bafatanije kubyara umwana bagomba gufatanya no kumurera kugira ngo agire imibereho myiza,ibindi bibafasha n’igihugu kikabafasha kubibona muri porogaramu zacyo z’imibereho myiza y’abaturage,ariko n’uruhare rwabo rwagaragaye.

Kuri uyu munsi byagaragaye ko hari abana bagera kuri 47 muri uyu murenge bazahajwe n’imirire mibi,barimo 3 bari mu mutuku, ku bibazo bavuga by’ubukene bukabije bituma  bamwe mu bana bakura nabi,umuyobozi w’aka karere wungirije ushinzwe imibereho myiza y’abaturage,Nsigaye Emmanuel akavuga ko batangiye kugenda babikemura.

Ababyeyi basabwe gufatanya kwita ku mwana ntawe utereranye undi

Izindi wakunda

Bwiza.com