bwiza.com
Amakuru Featured

Nyamasheke: Impanuka y’imodoka yahitanye umukecuru n’umuhungu we abandi 16 barakomereka

Ubwo kajugujugu ya gisirikare yamaraga gushyirwamo inkomere izijyanye mu bitaro by'umwami Faysal.

Imodoka taxi-minibus yari ifite plaque RAB 936 L, yari iturutse mu murenge wa Nyamyumba mu karere ka Rubavu yerekeza i Kamembe karere ka Rusizi aho abayirimo hafi ya bose bari abo mu muryango umwe abandi ari inshuti zabo za hafi bagiye gusura no guhemba umukobwa wabo uhashatse, igeze mu mudugudu wa Munimba, akagari ka Rugali mu murenge wa Macuba i Nyamasheke mu ma saa tanu n’igice z’amanywa kuri iki cyumweru ibura feri irenga umuhanda yitura mu kabande irangirika bikabije, 2 mu bari bayirimo bagwa mu bitaro bya Kibogora abandi barakomereka cyane.

Aganira na Bwiza.com, Uwintije Pacifique, utuye mu mudugudu wa Karangiro, akagari ka Cyangugu, mu murenge wa Kamembe mu mujyi wa Rusizi ubwo yari ku bitaro bya Kibogora, yavuze ko aba ari abo mu muryango we bari baje kumusura , kumuhemba no gukora ibyo bita kuronda isuka, kuko umwaka ushize yari yasabwe anakobwa n’umugabo we bamaranye imyaka 3 babana banafitanye umwana w’imyaka 2, kuva babana bakanabyarana, akanasabwa agakobwa bari batarahagera, bakaba bari baje kumusura no gukora ibyo bose.

Yangiritse bikomeye cyane

Yavuze ko umukecuru witabye Imana ari nyina wabo akaba yari afite imyaka irenga 60, wapfanye n’umuhungu we akaba na musaza w’uyu Uwintije w’aha kwa nyina wabo, wari mu kigero cy ’imyaka 30, usize umugore n’abana 2, nyina na we wari muri iyo modoka akaba yakomeretse bikomeye mu mutwe ari kwitabwaho mu bitaro bya Kibogora.

Yagize ati’’ bari baturutse iwacu mu mudugudu wa Busumba, akagari ka Munanira mu murenge wa Nyamyumba mu karere ka Rubavu baje kudusura , kuduhemba no kuronda isuka kuko dutuye i Kamembe mu mujyi wa Rusizi bakora iriya mpanuka kandi hafi ya bose ni abo mu muryango wanjye n’abandi bake b’inshuti zacu. Mukuru wa mama n’umuhugu we ari we musaza wanjye bamaze kwitaba Imana, mama na we yakomeretse cyane mu mutwe ari kwitabwaho n’abaganga, abandi 4 bamaze kujyanwa n’indege mu bitaro by’umwami Faysal.’’

Abaturage barashima RDF yahise ikora ubutabazi bwihuse.

Iyi mpanuka ikimara kuba umunyamabanga nshingwabikorwa w’umurenge wa Macuba, Bigirabagabo Moise, umuyobozi w’ingabo muri aka karere Lieutenant colonel Bikaga Donat n’uwinkeragutabara Lieutenant colonel Kamatari Jhon, polisi , ubuyobozi n’abaturage bahise batabara, kuko imodoka yari yangiritse cyane ngo byasabye kuyashisha amashoka ngo babashe gukuramo abari bahezemo,bose bahita bajyanwa mu bitaro bya Kibogora,barimo na bariya 2 bashizemo umwuka bagezeyo.

Umuyobozi w’aka karere Kamari Aimé Fabien aho yari ari kuri ibi bitaro yabwiye Bwiza.com ko nyuma yo kubona ko hari abarembye cyane bakeneye ubutabazi burenze ubuhari, basabye RDF banashimira cyane kubagoboka, ihita yohereza kajugujugu itwara 4 muri bo bakomeretse bikabije, abandi 12 bakomeje kwitabwaho n’abaganga.

Aha habereye iyi mpanuka ngo si ubwa mbere zihabera zikanahitana abantu, kuko ngo mu mezi atarenze 5 ashize hamaze kugwa izindi modoka 4 zirimo amakamyo 3 imwe yanahitanye umushoferi wayo w’umunyatanzaniya, hagwa n’ivatiri yari itwaye abajya mu bukwe I Rusizi babiri muri bo bahita bahasiga ubuzima, iyi yarenze umuhanda ikagwa mu kabande ikaba ari iya 4. Meya Kamari akaba yavuze ko bagiye kureba icyahakorerwa ngo hareke gukomeza guhitana ubuzima bw’abantu.

Yaguye mu kabande irashwanyanyagurika cyane.

Ati’’ yakoze impanuka irimo abantu 18 barimo umwana w’imyaka 3 na we wakomeretse mu mutwe, uretse bariya bapfuye n’abajyanywe mu bitaro by’umwami Faysal abandi bari kwitabwaho n’abaganga hano mu bitaro bya Kibogora, kariya kakaba ari agace kabamo impanuka cyane, kuhashyira dos d’âne kubera uburyo bamanuka cyane bikaba byateza izindi mpanuka,tukazareba ababishinzwe bakazatwigira icyo twahakorera.’’

Iyi mpanuka ibaye mu gihe hatarashira iminsi 2 ikamyo ihiriye mu murenge wa Kanjongo hafi y’aho iriya taxi yaguye umushoferi akayihiramo agakongoka na yo igakongoka,Meya Kamari agasaba abashoferi banyura muri aka karere kumenya ko ari ak’imisozi miremire,kuba umuhanda Kivu belt wegereye amazi ufite n’amakorosi menshi, bakajya bahanyura bitonze cyane,banabanje gusuzuma ibinyabiziga byabo ko ari bizima neza,abaturage nab o basabwa gukoresha umuhanda neza ngo birinde guhitanwa n’izo mpanuka.

Aha abakomeretse bari kwitabwaho n’abaganga.

Izindi wakunda

Bwiza.com