bwiza.com
Amakuru Iyobokamana

Rusizi: Abavuka mu murenge wa Nkanka baba ahandi bashyizeho ihuriro

Abapasiteri bari kumwe n'abagize iri huriro rigye gufasha mu mibereho myiza y'abaturage.

Abavuka mu murenge wa Nkanka mu karere ka Rusizi baba ahandi mu gihugu mu mirimo itandukanye basengera mu ma paruwasi ya Nkanka na Muramba muri ADEPR , bavuga ko nyuma yo gusubiza amaso inyuma bakareba akamaro ababyeyi babo babagiriye babafasha kwiga bakaba bashaje mu gihe aba bo bafite icyo bakora kibinjiriza amafaranga bashyizeho ihuriro bise “garuka ushime” rigamije kunganira ubuyobozi bw’uyu murenge n’iri torero kongera ibikorwa by’iterambere.

Baganira na Bwiza.com mu gusoza igiterane cy’ivugabutumwa no kwizihiza imyaka 22 ishize bamwe muri bo bari bakiri mu mashuri icyo gihe batangiye gusengera hamwe,bayitangarije ko basanze badakwiye gukomeza gutekerezanya nk’abasenganaga biga gusa muri icyo gihe,ko ahubwo bakwiye gushyiraho ihuriro rikora ibikorwa bifatika by’iterambere, barishinga umwaka ushize rigizwe n’abantu 130, ngo bakazajya bagira igenamigambi ry’myaka 5 ry’ibikorwa by’iterambere bazajya bahakorera.

Umuyobozi waryo,Pasiteri Kanyambo Jean Pierre avuga ko nyuma yo kureba ibyo aya maparuwasi yabo n’umurenge bikeneye mu ivugabutumwa,mu iterambere n’imibereho myiza y’abawutuye, ku ikubitiro bagiye kubaka ishuri ry’inshuke ryari rifite ibyumba 4 bitajyanye n’igihe, bagiye kurivugurura rikazabasha kwakira abana b’imyaka 3 y’inshuke mu gihe ubu ngo ryakiraga umwaka umwe gusa.

Avuga kandi ko kuba barimo abize ibitandukanye bizafasha mu gutekereza imishinga migari n’ishyirwa mu bikorwa ryayo,amafaranga bakazayishakamo ubwabo nk’uko babyiyemeje, icyo umurenge n’iri torero bazajya babasabamo ubufasha bakazajya bagikora,bakazibanda cyane cyane ku burezi, gutangira abatishoboye mituweli, kongerera ingufu imishinga y’urubyiruko, kurwigisha ijambo ry’Imana rirurinda ingeso mbi,n’ibindi.

Ati’’ ni ihuriro garuka ushime ADEPR Nkanka-Muramba,tumaze kubona akamaro ababyeyi bacu n’ubuyobozi batugiriye,bwaba ubwa Leta n’ubw’itorero, twasanze tudakwiye guhera aho twagiye guhahira ngo bajye batubona ku mafoto cyangwa twaje kubasura gusa na bwo rimwe na rimwe, duhitamo gukora iri huriro rigamije cyane cyane kuzamura urubyiruko n’abana bato duhereye mu burezi n’indangagaciro z’ubunyangamugayo no gukurira mu ijambo ry’Imana.’’

Yarakomeje ati’’ tuzi neza ko uyu murenge wacu ukeneye byinshi birimo ibikorwa remezo bidahagije ariko ibyo Leta irabikora, natwe nk’abana bawo, tuzi akamaro Leta n’itorero ryacu batumariye, tukaba tumaze kugira icyo tubona,dufite n’ababa mu bihugu byo hanze dushobora kugeza ho iki gitekerezo bakacyumva, turashaka gutanga umusanzu wacu ufatika mu kuzamura iterambere ryawo kandi intego yacu izagerwaho kuko twese tubyemeranywaho.’’

Abayobozi batandukanye mu giterane cy’ivugabutumwa cyateguwe n’iri huriro garuka ushime

Mujawayezu Dative wigisha kuri iri shuri bagiye kuvugurura,avuga ko ari igikorwa cy’indashyikirwa bagiye kubakorera kuko rinekeye byinshi cyane,ni iry’imbaho rikennye kuri byinshi akumva n’abandi bose bagiye bibuka iwabo igihugu cyose cyatera imbere.

Ati’’ ni byo byari bikwiye nk’uko n’umukuru w’igihugu cyacu abisubiramo iyo yahuye n’abanyarwanda baba mu mahanga muri’’Rwanda day’’ ababwira ko bagomba kwibuka ko bagiye guhaha,bakwiye no gutekereza aho bavuka. Aba bageze ikirenge mu cye,iyaba n’abandi bose bajyaga bibuka iwabo hari byinshi by’iterambere byakoreka kuko nk’ubu iri shuri nibaryuzuza rizakira abana benshi rinatange akazi.

Mukahirwa Félicité na we wo muri iri huriro,avuga ko umusanzu we nk’umurezi ari ukwita ku bangavu usanga bamwe babura ibyiringiro by’ejo hazaza kubera ubukene n’ibindi bibazo bibaviramo gutwara inda zitateganijwe,akazarukangurira mu mahugurwa anyuranye kwigirira icyizere rukirinda ibibi.

Umushumba wa paruwasi ya ADEPR Nkanka,Pasiteri Hatgekimana Jean Dmascène,yashimye iki gitekerezo abasaba ko bazanagira uruhare mu kubuzuriza urusengero batangiye ruzatwara akayabo ka 200.000.000, iri shuri ry’inshuke bakazubakamo ibyumba byinshi rikagira n’iribanza, ubufatanye bukazabageza kuri ibyo byose kuko byose bizakorwa bari kumwe.

Umuyobozi w’aka karere wungirije ushinzwe imibereho myiza y’abaturage,Nsigaye Emmanuel yishimira ibikorwa nk’ibi agasaba ko abafatanyabikorwa nk’aba bakwiyongera,kuko ibikorwa nk’ibi by’iterambere bizamura imibereho myiza y’abaturage bikihakenewe cyane.

Abagize ihuriro garuka ushime.
Abashumba b’amaparuwasi anyuranye ya ADEPR bashimira abagize iri huriro kuri iki gitekerezo.

Izindi wakunda

1 Igitekerezo

Olivier 18/08/2019 9:26 pm at 9:26 pm

Imana ishimwe cyane

Subiza

Tanga Igitekerezo

Bwiza.com