bwiza.com
Amakuru mashya

Uganda yafashe abakekwaho kohereza amabuye y’agaciro mu Rwanda bayise ibigori

Abapolisi n’abasirikare ku Mupaka wa Mirama (Kagitumba) bafashe abaturage bakekwaho kwinjiza amabuye y’agaciro mu Rwanda mu buryo butemewe bajijisha ko ari impeke z’ibigori.

Abafashwe n’abakozi ba kompanyi icukura amabuye y’agaciro yitwa Zanack Holding Mining ikorera Ruhaama mu Karere ka Ntungamo.

Uyu mukwabu wakozwe kuwa Kane nk’uko Daily Monitor dukesha iyi nkuru ibitangaza,  hafashwe toni y’amabuye y’agaciro yoherezwaga mu Rwanda mu butyo butemewe.

Aba baturage ngo binjizaga aya mabuye y’agaciro mu Rwanda bifashishije amagare, nk’uko abo mu kigo cy’Imisoro n’Amahaoro cya Uganda (URA) babitangaje.

Bavuga ko basatse imitwaro yerekezwaga mu Rwanda, bavumbura ko ari amabuye y’agaciro aho kuba ibigoro.

Umwe muri bo utashatse ko amazina ye atangazwa ati “ Twakemanze iyi mitwaro kuko yari mito mu gihe ubusanzwe bayitwara mu bintu binini. Twahagaritse abari bayitwaye ku magare, dutungurwa no kubona ko yari amabuye y’agaciro.”
Uyu yavuze ko abaturage bameze nk’aba bari  basanzwe bambuka umupaka ndetse bagaherekezwa na polisi.

Umuyobozi w’Umupaka wa Mirama, Ali Kakande yemeje aya makuru gusa yirinda kugira byinshi atangaza.
Ati “ Kugeza ubu amabuye y’agaciro ntari mu maboko yacu. Ikibazo cyayo kiri gukurikiranwa na polisi na gasutamo ibifite mu nshingano.”

Undi muyobozi wo muri URA wagize uruhare mu gufata aba baturage, yavuze ko hifashishwaga inzira zitazwi mu gace k’umupaka. Avuga ko amwe mu mabuye yabaga yikorewe ku mutwe no ku magare.

Ku rundi ruhande, abayobozi ba kompanyi ya  Zanack Holding Mining ntibabonetse ngo bagire icyo bavuga kuri iki kibazo.

Izindi wakunda

Bwiza.com