bwiza.com
Amakuru Amakuru mashya Politiki

Mu Rwanda havutse ishyaka ridaharanira imyanya ya Politiki

Mu Rwanda havutse umutwe mushya wa Politiki wiswe NDP, ufite umwihariko wo kuvuga ko udaharanira imyanya ya politiki.

Kugeza ubu mu Rwanda hari amashyaka 11 yemewe n’amategeko, ariko hakavugwa n’andi ane atarandikwa ngo yemerwe. Mu mashyaka atarandikwa, kuri uyu wa 21/08/2019 hiyongeyemo ishyaka rya Gatanu ari ryo NDP (National Democratic Party)

Umuyobozi w’iri shyaka rishya ni Augustin Niyitegeka, umaze imyaka hafi icumi yinjiye ku mugaragaro mu ruhando rwa politiki. Yatangarije Ijwi rya Amerika ko ashingiye ku burenganzira butangwa n’Itegeko Nshinga bwo kuba Umunyarwanda abasha gutanga ibitekerezo, biyemeje gushima aho babona bigenda neza, bakanenga kandi aho babona bitagenda neza.

Agustin Niyitegeka avuga ko  hari ibibazo bihoraho binyuranye Abanyarwanda bafite, byiganjemo ubushomeri, kubura ubuvugizi, ireme ry’uburezi n’ibindi bimwe na bimwe, bakaba bazanye akabo ngo bafatanye  n’abandi mu kubikemura.

Kuba ibibazo Augustin Niyitegeka abona atari ubwa mbere bivuzwe mu Rwanda, n’imitwe ya politiki isanzweho ikaba ibivugaho n’inzego za Leta zikaba zigira icyo zibikoraho, avuga ko umusaruro ari muto utagaragara nubwo ingamba zisanzweho ari nyinshi.

Niyitegeka Augustin, Umuyobozi w’Ishyaka NDP

Abagize iri shyaka mu ikubitiro bose bahoze mu yindi mitwe ya politiki. Mu ijwi ry’umuyobozi wabo avuga ko icyo bimirije imbere atari ukubona imyanya mu nteko. Niyitegeka ati : “Tumaze kwemererwa tukavuga ibituma Abanyarwanda hari aho bava n’aho bazamuka bivuye mu bitekerezo byacu, ni byo bifite agaciro kuruta kujya kwicara mu nteko … iyo myanya nishake izaze cyangwa irorere ariko tuvugire Abanyarwanda turebe igihunduka, ni nabwo amateka azatuvuga neza”

Niyitegeka Augustin avuga ko ntacyo babuze na kimwe cyatuma batemerwa n’amategeko, kuko ngo abarwanashyaka bahagije barabafite, n’ibindi byose bazasabwa bigenwa n’amategeko barabifite, bakaba bagiye kwiyandikisha.

Iri shyaka rishya NDP riramutse ryemewe ryaba ari irya 12 mu mashyaka yemewe mu Rwanda, rigasanga : FPR, PL, PSD, PSR, PSP, PPC, PDI, PDC, UDPR, DGPR, PS-Imberakuri.

Mu gihe kandi ritaremerwa ni irya gatanu nyuma ya PDP Imanzi rya Deo Mushaidi , FDU Inkingi, PS Imberakuri uruhande ruyobowe na Me Bernard NTAGANDA n’Ishyaa PPR rya Philippe Mpayimana.

 

Urugendo rwa NIYITEGEKA Augustin muri politiki

 Mu mwaka wa 2010 ubwo hashingwaga Ishyaka ryiswe PS Imberakuri, nibwo Augustin Niyitegeka yaratngiye kugaragara mu ruhando rwa politiki, kuko nyuma yaho iri shyaka ryigabyemo amashami abiri, irtya Ntaganda warishinze n’irya Mukabunani, Niyitegaka yakomezanyije na Mukabunani mu buyobozi.

Yaje kuva mu Rwanda ajya mu Burundi, agaruka mu mwaka wa 2014, benshi bakimufata nk’imberakuri. Yatunguranye ku itariki ya 21 Gicurasi 2017 avuga ko abaye bidasubirwaho umuyoboke wa FPR Inkotanyi kandi ko yiteguye kuryamamaza yivuye inyuma mu matora yateganywaga muri uwo mwaka.

Nyuma y’indi myaka ibiri, yumvikanye kuri uyu wa 21 Kanama 2019 atangaza ku mugaragaro Ishyaka ayoboye ryiswe ishyaka rya Demokarasi y’Abanyarwanda, NDP.

 

NTWALI John Williams

Izindi wakunda

Bwiza.com