bwiza.com
Ahabanza » Nyamasheke: Abarobyi biyemeje guhangana n’ikibazo cy’imirire mibi mu bana
Amakuru mu Rwanda

Nyamasheke: Abarobyi biyemeje guhangana n’ikibazo cy’imirire mibi mu bana

Ubuyobozi bw’ihuriro ry’amakoperative y’abarobyi mu karere ka Nyamasheke buravuga ko  bugiye gutanga toni y’isambaza n’indugu mu mwaka w’uburobyi 2019-2020 zizafasha mu guhangana n’imirire mibi  n’igwingira mu bana bari munsi y’imyaka 5,iyi gahunda ikazunganira izindi zisanzweho ziyirwanya , bakizera ko ku bufatanye n’ubuyobozi bw’akarere n’izindi nzego zishishikajwe n’imibereho myiza y’abana  bazayihashya.

Nk’uko Bwiza.com  yabitangarijwe n’umuyobozi w’iri huriro Ndahayo Eliezer ubwo bamwe mu bafite abana bafite imirire mibi bitabwaho n’ikigo nderabuzima cya Kamonyi mu murenge wa Ruharambuga  bahabwaga isambaza n’iri huriro, ngo babitekereje nyuma yo kubona ko hari abana benshi bazahazwa n’imirire mibi kandi aka karere gafite amahirwe y’iki vu kirobwamo ibikomoka ku mafi bigira uruhare mu kurwanya iyi mirire mibi nyamara igakomeza ikiyongera, basanga na bo hari uruhare  bakwiye gushyiraho ngo igabanuke.

Avuga ko banasanze abana bo mu mirenge itegereye ikivu bagira ikibazo cyo kubona isambaza kuko zibageraho zihenze cyane nta n’ubushobozi bafite bwo kuzigura,bakazabibandaho cyane, aho bazahabwa isambaza mbisi n’indugu zizajya zikurwamo ifu bakayishyira mu bindi batekera aba bana,haba mu gikoni cyangwa iziko ry’umudugudu no mu ngo iwabo.

Ati’’ ntibyumvikana kuba aka karere gafite iki kiyaga nk’amahirwe y’imirire myiza kubera ibikomoka ku mafi bikibamo, nyamara ukahasanga abana benshi bazahajwe n’imirire mibi, tugasanga ikibazo kiri mu myumvire ya bamwe mu babyeyi batabonera umwanya uhagije abana ngo babiteho, hakaba n’ubukene bwa bamwe muri bo butabemerera kubona isambaza nk’izi ngo babahe , tukaba tugiye  kuzibabonera cyane cyane ab’ubushobozi buke.’’

Yarakomeje ati’’ twarisuzumye dusanga ari ikimwaro kuba turoba isambaza nyinshi  muri iki kivu ariko abagituriye n’abatuye imirenge itacyegereye abana babo bagakomeza kuzahara, dusanga gukorana n’ibigo nderabuzima n’ubuybozi tukabaha izi sambaza n’ifu y’indugu bizagira akamaro gakomeye cyane,tugasaba ko abana tuzigenera zabageraho koko nk’uko tubyifuza nubwo tuzagenda tubikurikirana n’abajyanama b’ubuzima  bakabidufashamo.’’

Bamwe mu bafite abana bafite iki kibazo bavuga ko biterwa n’impamvu nyinshi ariko cyane cyane ubukene bukabije butuma batabasha kubona icyo bashyira ku ziko ngo abana barye neza bahage, kubyara indahekana nta bushobozi kuzitaho bikagorana,abakobwa  babyarira iwabo haba hanasanzwe ubushobozi buke mu biribwa abababyaye bakabata aho bakigendera, bagakubitwa n’imirire mibi kubera kutitabwaho, gukora kure y’ingo abo basigiye abana bagasanga batabitayeho neza,n’ibindi bavuga ko bibitera.

Niyogisubizo Jacqueline w’imyaka 20,wo mu kagari ka Ntendezi mu murenge wa Ruharambuga avuga ko yatewe inda yiga mu wa 3 w’ayisumbuye,akaba afite umwana w’umwaka n’amezi 4 wamurwaranye indwara ziterwa n’imirire mibi kubera kubura icyo amuha.

Ati’’ umusore wanteye inda yanyizezaka kunjyana agira ibibazo bituma tutabana, iwacu nta bushobozi bafite bwo kuntungana n’uyu mwana n’abandi bahari, byanabaye ngombwa ko mva mu ishuri  ngo mwiteho ariko nta kazi mbona ngo ngire icyo muha. Ubukene ni bwo bubidutera kuko ntiwabona ibiryo ngo uyoberwa kubiteka, nkatwe abana babyarira iwabo ku mpamvu zitaduturutseho tugasaba kwitabwaho by’umwihariko nk’uko aba barobyi babikoze,tukabona icyo duha abo tubyaye.’’

Mukamazimpaka Vestine ukuriye abajyanama b’ubuzima mu mudugudu wa Kamonyi,akagari ka Ntendezi , avuga ko nubwo n’ubukene bubitera  ariko harimo n’imyumvire ikiri hasi,cyane cyane ku babasha kubona icyo bakora bakayapfusha ubusa bakibagirwa ko babyaye, abakobwa batinya kuvuga ‘oya’ bakarinda gutwara inda batazi uko bazarera abo babyaye, guhenda kw’ibiribwa   kuko mu bihe nk’ibi by’impeshyi n’imboga ziba zarumye ahenshi,agasanga iyi gahunda yo guha abana isambaza muri ubu buryo hari icyo igiye gufasha mu guhangana n’ibi bibazo.

Aka karere karacyabarirwamo abana bagaragaraho imirire mibi nubwo ngo umubare wabo ugenda ugabanuka kubera imbaraga zishyirwamo nk’uko bivugwa n’umuyobozi wako  wungirije ushinzwe iterambere ry’ubukungu,Ntaganira Josué Michel  ushima cyane aba barobyi bagiye kubafasha guhangana n’iki kibazo,agasaba ababyeyi kurushaho kwita ku bana babo badategereje buri gihe ubufasha buturuka hanze.

Izindi wakunda

Bwiza.com