bwiza.com
Amakuru Politiki

Igihugu cya Gambia cyabonye minisitiri w’ingabo wa mbere kuva mu myaka 22 ishize

Perezida w’igihugu cya Gambia, Adama Barrow kuri uyu wa Kane, itariki 22 Kanama yavuguruye guverinoma ashyiramo minisitiri w’ingabo wa mbere igihugu kigize kuva mu myaka 22 ishize.

Sheikh Omar Faye (wambaye amataratara ku ifoto) wahoze ari umukinnyi w’umukino ngororamubiri wo gusiganwa ku maguru, akaba yari ahagarariye Gambia muri Arabia Saoudite, niwe wagizwe minisitiri w’ingabo wa Gambia nk’uko itangazo ryavuye muri Perezidansi rivuga.

Kuva mu 1997, kubwa Perezida Yahya Jammeh, wayoboje igihugu inkoni y’icyuma kuva mu 1994 kugeza mu 2017, ndetse na nyuma yo gusimburwa na Adama Barrow, imirimo ya minisitiri w’ingabo yarebaga umukuru w’igihugu.

Minisitiri w’ingabo washyizweho yigeze kwitabira imikino ya Olimpiki (JO) mu 1984, ndetse akora igisirikare kugeza mu 1994 ubwo yavaga muri Gambia akajya muri Leta Zunze Ubumwe za Amerika nk’uko iyi nkuru dukesha Jeune Afrique ikomeza ivuga.

Ubwo yagarukaga muri Gambia mu 2005, yabaye ukuriye itangazamakuru muri cabinet ya perezida Jammeh, aba minisitiri w’urubyiruko na siporo mbere yo kugirwa Ambasaderi i Washington.

Uyu ariko yari yaratangiye kwitandukanya n’ubutegetsi bwa Yahya Jammeh mu mpera zabwo, ubwo yamuhamagarira mu Ukuboza 2016, ari I Washington, kwemera ko yatsinzwe amatora na Adama Barrow.

 

Izindi wakunda

Bwiza.com