bwiza.com
Amakuru Politiki

Burundi: Abanyonzi ntibahawe amafaranga bemerewe ngo bitabire imyigaragambyo

Abanyonzi bo mu murwa wa Bujumbura bavuga ko babwiwe ko bahabwa amafaranga yo kwitabira imyigaragambyo yabaye kuri uyu wa 24 Kanama n’ubu bakaba batarayahabwa.

Iyi myigaragambyo yakoze n’Abarundi bakora imirimo itandukanye, barimo n’aba banyonzi, yamaganaga itsinda ry’impunzi z’Abarundi rya ‘Himbaza Drummers’ ryahawe ubuhungiro mu Rwanda, riherutse kwitabira irushanwa rya East Africa’s Got Talent riri kubera muri Kenya.

Abarundi bavuga ko aba bakaraza ba Himbaza Drummers bibye ingoma z’Uburundi ndetse biganye n’umurishyo wabo (uburyo bwo gukaraza).

Mu butumwa bwabo, bashinja u Rwanda gukoresha kwigana (bakoresha ijambo ‘kwiba’) izi ngoma , bakavuga ko bihabanye n’amategeko mpuzamahanga y’umurage w’ishami ry’Umuryango w’Abibumbye wita ku burezi n’umuco (UNESCO).

Aba banyonzi bavuga ko bari barasezeranyijwe amafaranga y’Amarundi 3000. Tuyashyize mu manyarwanda, akabakaba 1500.

Jules, Umunyonzi wo muri Kinama yabwiye SOS Media ko basezeranyijwe kwishyurwa aya mafaranga imyigaragambyo irangiye. Bakoze urutonde rw’abayitabiriye ariko birangira nta cyo babonye. Avuga ko abagombaga kubishyura bahise bigendera.

Iyi myigaragambyo yabaye nyuma y’aho ibigo bya Clouds Media International na Rapid Blue byateguye irushanwa rya East Africa’s  Got Talent byasubije Uburundi ko Himbaza bafite ubuhungiro mu Rwanda kandi buri wese uturuka mu Rwanda, Kenya, Uganda na Tanzania; bagiye ku giti cyabo (ntiboherejwe n’ibihugu runaka).

Kuri uyu wa 24 Kanama, Abarundi bigabije imihanda ya Bujumbura bigaragambya
Himbaza Drummers baserukanye ingoma ziremereye ku wa 18 Kanama, ni bo mpamvu y’imyigaragambo mu Burundi

Izindi wakunda

Bwiza.com