bwiza.com
Amakuru Ubukungu

Nyabitekeri: Abahinzi b’inyanya babangamiwe n’umuhanda  mubi ubabuza kugeza umusaruro ku isoko

Ubuyobozi bwishimira uyu musaruro no gufasha mu bikenewe ngo wiyongere unagurishwe neza

Abahinzi b’inyanya bibumbiye muri koperative ‘CODEANYA kotanira ubwiyunge’ ikorera mu murenge wa Nyabitekeri mu karere ka Nyamasheke, baravuga ko bamaze kugera ku kigero cyo kubona umusaruro mwinshi ubasha kugera ku masoko manini yo mu Ntara y’Uburengerazuba, amajyepfo n’umujyi wa Kigali ariko ububi bw’umuhanda Ntango-Shangi-Bushenge bukababera imbogamizi.

Nk’uko Bwiza.com  yabitangarijwe n’umuyobozi w’iyi koperative, Ngirinshuti Fidèle, ngo yashinzwe  muri 2010, n’urubyiruko rwagizwe imfubyi na Jenoside yakorewe Abatutsi n’urwazibaye nyuma y’uko ababyeyi barwo bicwa n’agakoko gatera SIDA, rusanga rukwiye kwishyira hamwe rugashaka uko rwakwikura mu bukene no mu bwigunge kuko rwasaga n’urwandagaye kandi ari rwinshi,batangira aro abasore 10 n’inkumi 20, nyuma bongera abanyamuryango bashyiramo n’abagabo n’abagore basanzwe,ubi ni  68.

Avuga ko mu guharanira kwigira babanje gucuruza inyanya ku dutaro baza gusanga ubwo buzima bugoye cyane bagura umurima wa ½ cya hegitari batangira  kuzihingira hafi y’ikivu mu kagari ka Ntango muri uyu murenge wa Nyabitekeri bavomesha amajerikani mu kivu buhira, kubera ko nta bundi bushobozi bari bafite bagahinga ku mpeshyi gusa aho babonaga inyungu y’amafaranga  360.000 ku mwero.

Akomeza avuga ko muri iyo mibereho ishaririye ariko bihanganiraga kuko nta kundi bari kubigenza,muri 2017 babonye umuryango w’abanyamerika ushinzwe iterambere ( USADF) ubaha inkunga y’amanyarwanda 71.992.958,bituma bongera abanyamuryango bagura n’ibikoresho byo kuhira bakoresheje ikiyaga cya kivu, bongera n’ubuso buhingwa bagera kuri hegitari 2,5,aho batangiye guhinga ibihembwe 3 ku mwaka   bakabona amafaranga ari hagati ya miliyoni n’igice na miliyoni 3 z’amanyarwanda buri gihembwe,ari bwo batangiye gukoresha n’abakozi bahemba buri kwezi, ngo bafite abakozi 7 bahoraho n’aba nyakabyizi 15 na bo bahoraho,batangira no kubona amafaranga agira aho abakura n’aho abageza mu mibereho.

Ubwo berekaga umufatanyabikorwa wabo  wa USADF ibyo bamaze kugeraho n’aho bifuza kugana kuko ngo bagiye kongera abanyamuryango n’ubuso buhingwa bakagera kuri hegitari 8, kuko uburyo bakora bwo kuhira hakoreshejwe imashini zikoresha imirasire y’izuba butanga icyizere cy’umusaruro mwinshi cyane ushobora gukura abaturage benshi b’aka gace mu bukene bakigaragaramo, bagaragaje imbogamizi ikomeye ijyanye n’umuhanda mubi utabasha kubageza ku masoko akomeye.

Ngirinshuti yagize ati’’ turifuza gukura aka gace kose mu bukene dukoresheje ubu buhinzi twamaze kubona ko butanga icyizere ariko uyu muhanda Ntango-Shangi-Bushenge uratubangamiye cyane kuko n’iyo tugerageje gukoresha imodoka tugeza umusaruro ku muhanda munini Rusizi-Huye na Rusizi-Rubavu wangiritse cyane,ari yo mpamvu duhitamo gukoresha inzira y’ikivu ngo tubazhe kuwugeza I Bukavu na Goma muri Kongo na Kamembe na Rubavu mu Rwanda,ariko  birababaje cyane kuba nk’isoko rya Bushenge ritwegereye tudashobora kuwuhageza.’’

Avuga ko biteze ko uyu mufatanyabikorwa ashobora kubaha andi  mafaranga agera kuri miliyoni 150 yabafasha kongerera agaciro umusaruro wabo harimo no kugura imashini ihinga yanifashishwa n’abandi bahinzi b’uyu murenge,icyombo n’imodoka byabafasha kugeza umusaruro ku masoko yo hirya no hino,ubuhunikiro  bwatuma babasha kugura n’undi musaruro w’’inyanya abandi baturage bahinga cyangwa bakawubabikira igihe babyifuje n’ibindi,ariko ngo igihe nta muhanda muzima bafite,biracyabagoye cyane.

Umuyobozi w’aka karere wungirije ushinzwe iterambere ry’ubukungu,Ntaganira Josué Michel, avuga ko ari intambwe ikomeye cyane kuba uru rubyiruko rwari mu bibazo bikomeye rwatewe n’amateka mabi igihugu cyanyuzemo rwarabashije gutekereza icyagirira igihugu cyose akamaro, aha hakaba ari ho honyine hakoreshwa ikoranabuhanga mu kuhira mu mirenge yegereye ikivu muri aka karere n’ahandi bigeragejwe bagakora gakondo,avuga ko inyigo y’uyu muhanda iri gutegurwa.

Ati’’ uyu muhanda koko uteye impungenge abaturage b’iyi mirenge yose ukoraho ariko inyigo yawo,kimwe n’indi 3 ibabaje y’aka karere iri gutegurwa,tukizera ko ubushobozi nibuboneka tuzawihutira.’’

Umukozi wa USADF  Marc O’Neil yabashimiye aho bageze mu iterambere,abizeza ubufatanye ngo n’ibindi bizagerweho,abasaba kongera n’abanyamuryango ngo iterambere rigere kuri benshi.

Abaturage b’uyu murenge bavuga ko uyu muhanda utabangamiye abahinzi b’inyanya gusa,na bo ubabangamiye
Abayobozi bifatanya n’abaturage mu gutegura umurima uzahingwamo inyanya
Ubuyobozi bwishimira uyu musaruro no gufasha mu bikenewe ngo wiyongere unagurishwe neza

Izindi wakunda

Bwiza.com