bwiza.com
Amakuru Politiki

Rusizi: Prof. Kalisa Mbanda yanenze abakandida Senateri biyamamaza bavuga iby’aho bavukiye

?

Perezida wa komisiyo y’igihugu y’amatora (NEC), Prof.Kalisa Mbanda yakebuye bamwe mu bakandida sena bari batangiye gutana mu mvugo, bavuga ibyo yise ko bitari ngombwa, birimo iby’aho bavukiye, aho bakuriye n’aho basabye abageni n’ibindi avuga ko bidakwiye gushyirwa imbere kuruta icyo bazamarira abaturage.

Yabakeburiye mu Ntara y’Iburengerazuba aho abakandida  15 bazatorwamo abasenateri 3 bazahagararira iyi Ntara mu nteko ishinga amategeko umutwe wa sena, mu matora azaba ku wa 16 Nzeri uyu mwaka. Batangiriye urugendo rwabo rwo kwiyamamaza mu Karere ka Rusizi kuri uyu wa 27 Kanama imbere y’abagize inteko itora n’abandi baturage bari babateze amatwi biyumvira imigabo n’imigambi y’aba bakandida.

Muri uku kwiyamamaza aho buri mukandida yafataga iminota igera mu 10 akivuga ibigwi,harimo amashuri yize,ibyo yakoreye igihugu n’icyo amaturage bamutezeho igihe yazaba atorewe kwicara kuri iriya ntebe, benshi mu byo bavugaga bazibandaho biteza imbere abaturage ,bagarukaga ku kuzamura ireme ry’uburezi kuko hafi ya bose babaye abarezi, kongerera agaciro ibikorwa by’ubuhinzi,kurwanya ihohoterwa rikorerwa  cyane cyane abagore n’abakobwa nubwo ngo n’irikorerwa abagabo batazaryirengagiza.

Hari kandi gukomeza kuzamura ibice by’icyaro bigikennye cyane, gukomeza ubuvugizi mu kuzamura imijyi yunganira umujyi wa Kigali, kwita ku bworozi, kurwanya amakimbirane yo mu ngo,ingufu mu ikoranabuhanga no guhanga udushya,n’ibindi buri wese yavugaga ashaka kwigarurira imitima y’abazatora ngo bazamuhundagazeho amajwi.

Muri uku kwivuga ibigwi ariko hagaragaye ngo n’abavuga ibitari ngombwa,aho hari abazanaga cyane iby’aho bavukiye,aho bakuriye n’aho basabye abageni  akaba ngo ari byo bashaka gushyira imbere kuruta icyo bazamarira abaturage,ibi Prof.Kalisa Mbanda akaba yabinenze cyane, ndetse aca mu ijambo umwe mu bavugaga nk’ibyo,aho yagize ati’’ bwana…….( amuvuga mu izina),ibyo muvuga ni byiza ariko birabogamye. Tureke kubogamira aho twavukiye n’aho twakuriye,turi abanyarwanda.’’

Ibi byatumye Bwiza.com  imubaza niba mu kwiyamamaza hari ibyemerewe kuvugwa n’ibitemerewe,asubiza agira ati’’  Hari ibibujijwe nko kunenga mugenzi wawe w’umukandida,gushyira imbere aho wavukiye,aho uturuka cyangwa idini ubamo. Ibyo bintu bigenda bigabanya abanyarwanda mo ibice,bitugarura inyuma mu bijyanye no gutandukanya abanyarwanda kandi nta mpamvu,ibyo ni byo bibujijwe.’’

Yakomeje agira ati’’ kwiyamamaza ni ukwivuga neza,ukavuga icyo ushoboye n’icyo uzamara,si ukuvuga ubwoko bwawe,idini yawe,aho wavukiye,aho wakuriye,n’ibindi nk’ibyo kuko ibyo si byo byerekana ko ufite ubushobozi bwatuma bagutora.’’

Abajijwe niba hari itegeko ribihana yagize ati’’ rirahari. Mu mabwiriza no mu mategeko birimo,ubikoze bwa mbere turamwihangangiriza,yabikora ubwa 2 tukamwandikira,ubwa 3 tukamukura kuri Liste y’itora,ariko hari n’ibindi bikorwa bishobora kuba ibikorwa  bibuzwa n’amategeko mpanabyaha,icyo gihe bikurikiranwa n’inzego zibireba.’’

Ku byo abaturage bakunze kuvuga ko iyo abakandida nk’aba biyamamaza baba bafite akarimi keza ariko bamara gutorwa bagaherukana ubwo,banagaruka mu miganda ntibanabasuhuze ngo bongere basabane nk’uko basabanaga babasaba amajwi,Prof.Kalisa Mbanda yavuze ko  bakwiye gushishoza mu gutora abo b’akarimi ariko batazagira icyo babamarira bakabirinda, yishimira ko muri rusange kwiyamamaza nta zindi mbogamizi byatangiranye,abasaba kuziyereka n’abaturage batari mu nteko itora bakababona,bapfa kuba babisabiye uburenganzira akarere na komisiyo y’igihugu y’amatora.

Umwe mu bakandida biyamamazaga, Mporanyi Théobald,wari umaze imyaka 10 ari umudepite akaba ashaka kuba senateri yatangarije Bwiza.com  ko nubwo hari byinshi byakozwe hari n’ibindi byinshi bigikenewe gushyirwamo imbaraga birimo guhangana n’abatera inda abana batarageza ku myaka y’ubukure, guhanga imirimo myinshi yateza imbere urubyiruko,imibanire myiza mu miryango,n’ibindi,akumva abazatorwa bazabyibandaho,kimwe n’ibindi bazasanga ari ngombwa.

Abakandida 15 biyamamaza mu ntara y’uburengerazuba barimo abagabo 10 n’abagore 5, abaturage bakavuga ko bifuza ko ibyo bababwiye biyamamaza abazatorwa batazabigira amasigaracyicaro,ko bazabavuganira koko, cyane cyane ahakiri ibibazo by’isuku nke kubera kutagira amazi meza, aho bateza neza kubera kubura amafumbire n’ibindi bya ngombwa,bakazaharanira koko iterambere ry’umuturage,aho kuzongera guhura bagarutse kubashakamo amajwi.

Abakandida senateri bahagarariye intara y’uburengerazuba
Abagize inteko itora bakurikirana uko abakandida biyamamaza

Izindi wakunda

2 Ibitekerezo

Hishamunda 28/08/2019 9:05 pm at 9:05 pm

Amahirwe masa ku mukandida wacu Nkiliye Ildephonse. Uwiteka azakugende imbere mu bikorwa byawe byo kwiyamamaza kandi azaguhe imbaraga zo guhigura imihigo yawe igihe cyose waba utowe. Ibyiza biri imbere.

Subiza
Evariste J.Musonera 28/08/2019 11:09 pm at 11:09 pm

Dr. MWALIMU EMMANUEL HAVUGIMANA,
Umuntu yavuze ukuri, ati: Utazamutora ni uramuzi.
Umuhanda, umwigisha, umuyobozi, umugabo urangwa n’urukundo ku mutima, inyangamugayo.
Jyewe muzi cyane mu bihugu byo hanze (DIASPORA) , nkanemeza ko iyo aba Ali twe dutora yatahana majwi 100%. Yewe nta n’uwakwirirwa amupinga.
Banyarwanda muzamutore muli Senat yanyu, ntimuzabyicuza.

Subiza

Tanga Igitekerezo

Bwiza.com